ភ្នំពេញ៖ កិច្ចព្រមព្រៀង ស្តីពីការចៀសវាងការយកពន្ធត្រួតគ្នា (Double Taxation Agreement-DTA) រវាងកម្ពុជា និងមីយ៉ាន់ម៉ានេះ នឹងក្លាយជាចលករ ដែលរួមចំណែកជំរុញទំនាក់ទំនងពាណិជ្ជកម្ម និងវិនិយោគប្រទេសទាំងពីរឱ្យប្រសើរឡើង។ នេះបើតាមការលើកឡើងរបស់ លោកបណ្ឌិត សេង ជាសិទ្ធ ប្រធាននាយកដ្ឋាននីតិកម្ម គោលនយោបាយ សារពើពន្ធ និងសហប្រតិបត្តិការពន្ធដារអន្តរជាតិ។

កិច្ចព្រមព្រៀង DTA ជុំទី២ ដែលធ្វើឡើងតាមរយៈប្រព័ន្ធវីដេអូ កាលពីថ្ងៃទី១៣-១៥ ខែមករា ឆ្នាំ២០២៥ភាគីកម្ពុជា និងមីយ៉ាន់ម៉ា បានពិភាក្សាលម្អិត និងស៊ីជម្រៅលើគ្រប់មាត្រា និងចំណុច ដែលនៅសេសសល់ទាំងអស់ និងពុំទាន់បានឯកភាព នៅជុំទី១។ ជាលទ្ធផល ភាគីទាំងពីរ បានដោះស្រាយបញ្ហា ដែលនៅសេសសល់ទាំងអស់ ដោយក្នុងនោះមាត្រាទាំង ៣១ នៃកិច្ចព្រមព្រៀង ត្រូវបានឯកភាពគ្នាទាំងស្រុង។

គួរបញ្ជាក់ថា ក្នុងចំណោមរដ្ឋសមាជិកអាស៊ានទាំង១០ មីយ៉ាន់ម៉ា គឺជារដ្ឋសមាជិកអាស៊ានចុងក្រោយគេ ដែលកម្ពុជាត្រូវចរចាកិច្ចព្រមព្រៀង DTA ជាមួយ ដើម្បីឈានទៅសម្រេចបានវិធានការទាក់ទិននឹងពន្ធដារ ដែលមានចែងក្នុងផែនការមេសហគមន៍ សេដ្ឋកិច្ចអាស៊ាន។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ៕