2026-11-17
SME News
2026-11-17
SME News
ភ្នំពេញ៖ ថ្ងៃទី១៥ ខែវិច្ឆិកា ឆ្នាំ២០២៦ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញឱ្យស្ថាប័នផ្តល់ឥណទាន ប្រើប្រាស់របាយការណ៍លំហូរសាច់ប្រាក់ឱ្យបានកាន់តែទូលំទូលាយ និងរៀបចំហិរញ្ញប្បទានឱ្យស្របនឹងតម្រូវការរបស់អាជីវកម្មខ្នាតតូច ដើម្បីឱ្យអាជីវកម្មទាំងនេះអាចទទួលការបញ្ជាទិញក្នុងបរិមាណកាន់តែច្រើន វិនិយោគលើគ្រឿងម៉ាស៊ីន និងអាចផលិតផ្គត់ផ្គង់ដល់រោងចក្រធំៗ។
ថ្លែងនៅក្នុងកិច្ចប្រជុំកំពូល Black Swan Summit Cambodia ឯកឧត្តមរដ្ឋមន្ត្រីបានលើកឡើងថា៖ "អ្នកផលិតអាហារត្រូវការទុនបង្វិលនៅពេលរង់ចាំការទូទាត់។ សិប្បកម្មមួយត្រូវការពេលវេលាដើម្បីសងប្រាក់កម្ចីដែលបានយកមកទិញគ្រឿងម៉ាស៊ីន។ ក្រុមហ៊ុនបច្ចេកវិទ្យាដែលទើបបង្កើតថ្មីអាចត្រូវការកៀរគរទុនពីវិនិយោគិន មុននឹងមានលទ្ធភាពខ្ចីប្រាក់។"
ឯកឧត្តមបានសង្កត់ធ្ងន់លើការប្រើរបាយការណ៍អាជីវកម្ម និងកំណត់ត្រាទូទាត់ឌីជីថល ដើម្បីវាយតម្លៃសមត្ថភាពសងប្រាក់របស់អ្នកខ្ចី ព្រមទាំងលើកពីជម្រើសហិរញ្ញប្បទាន ដូចជាការបង់រំលោះគ្រឿងម៉ាស៊ីន ហិរញ្ញប្បទានផ្អែកលើវិក្កយបត្រ ឬការបញ្ជាទិញ និងការធានាឥណទានជាដើម។
ឯកឧត្តមរដ្ឋមន្ត្រីបានរំលេចពីប្រព័ន្ធទូទាត់បាគង ជាឧទាហរណ៍មួយនៃនវានុវត្តន៍ហិរញ្ញវត្ថុ ដោយអាជីវករអាចប្រើកូដ QR តែមួយ សម្រាប់ទទួលការទូទាត់ពីអតិថិជនដែលប្រើសេវារបស់ស្ថាប័នហិរញ្ញវត្ថុផ្សេងៗ។
ឯកឧត្តមបានបន្ថែមថា៖ "ហិរញ្ញប្បទានផ្តល់ផលកាន់តែច្រើន នៅពេលអាជីវកម្មមានជំនាញបច្ចេកទេស បច្ចេកវិទ្យា ផលិតផលមានគុណភាព និងអតិថិជន ដែលជួយឱ្យអាជីវកម្មទាំងនោះប្រើប្រាស់ទុនបានប្រកបដោយប្រសិទ្ធភាព។"
ឯកឧត្តមរដ្ឋមន្ត្រីបានជំរុញឱ្យស្ថាប័នហិរញ្ញវត្ថុ ពង្រឹងការធានាសុវត្ថិភាពប្រតិបត្តិការ បង្ហាញថ្លៃសេវាឱ្យបានច្បាស់លាស់ និងដោះស្រាយបញ្ហាដោយយុត្តិធម៌ ដើម្បីពង្រឹងទំនុកចិត្តលើការទូទាត់តាមប្រព័ន្ធឌីជីថល។
កិច្ចប្រជុំកំពូល Black Swan Summit Cambodia ត្រូវបានសហការរៀបចំឡើង ដោយធនាគារជាតិនៃកម្ពុជា និងបណ្តាញហិរញ្ញវត្ថុ និងបច្ចេកវិទ្យាសកល (GFTN) នៅថ្ងៃទី១៥ និងទី១៦ ខែវិច្ឆិកា ស្របពេលនឹងកិច្ចប្រជុំកំពូលហ្វ្រង់កូហ្វូនីលើកទី២០ ក្នុងគោលបំណងពង្រឹងទំនាក់ទំនងសេដ្ឋកិច្ចរវាងអាស៊ាន និងបណ្តាប្រទេសហ្វ្រង់កូហ្វូនី តាមរយៈកិច្ចសហការលើការទូទាត់ឆ្លងដែន និងសេវាហិរញ្ញវត្ថុឌីជីថល។
នាំមកជូនដោយ

2024-11-29
ឃី ភារៈADB អនុម័តកម្ចីចំនួន ៥០លានដុល្លារ ដល់កម្ពុជា ជំ...

2023-08-13
លោក រាជៈ ឥន្រ្ទរៈរដ្ឋមន្រ្តីការបរទេសចិនបង្ហាញជំនឿចិត្តចំពោះមុខ ស...

2024-07-28
គិត បុប្ផាតើ«សហគ្រិនភាពឌីជីថល»ជាអ្វី? ផ្តល់ប្រយោជន៍អ្វីខ្...


2024-11-29
ដេប៉ាលីយែរ ម៉ារីលីណាតើគោលនយោបាយជាតិស្តីពី«វិទ្យាសាស្ត្រ បច្ចេកវិទ្យ...
ដីឡូត៍លេខ១១ ផ្លូវសម្តេច ជា ស៊ីម (1928) ភូមិច្រេស សង្កាត់គោកឃ្លាង ខណ្ឌសែនសុខ រាជធានីភ្នំពេញ
096 85 222 85 / 012 81 08 81
Telegram Contact
© រក្សារសិទ្ធគ្រប់យ៉ាងដោយ អង្គភាពសារព័ត៌មាន អេស.អ៊ឹម.អ៊ី