ភ្នំពេញ៖ ឯកឧត្តម Dhan Bahadur Oli ឯកអគ្គរដ្ឋទូតនេប៉ាល់ថ្មី ប្រចាំកម្ពុជា ប្តេជ្ញាជំរុញទំនាក់ទំនងរវាងនេប៉ាល់ និងកម្ពុជា ពង្រីកកិច្ចសហប្រតិបត្តិការក្នុងវិស័យធុរកិច្ច និងសម្របសម្រួលរៀបចំឱ្យមានកិច្ចប្រជុំពិគ្រោះយោបល់ទ្វេភាគីរវាងក្រសួងការបរទេសប្រទេសទាំងពីរផងដែរ។

កិច្ចពិភាក្សាការងារ ដែលធ្វើឡើង កាលពីថ្ងៃទី៧ ខែកុម្ភៈ ឆ្នាំ២០២៥ នៅវិមានសន្តិភាពជាមួយ ឯកឧត្តម Dhan Bahadur Oli សម្តេចធិបតី ហ៊ុន ម៉ាណែត បញ្ជាក់ថា កិច្ចប្រជុំពិគ្រោះយោបល់ទ្វេភាគីរវាងក្រសួងការបរទេសទាំងពីរ នឹងជួយពង្រឹង និងពង្រីកកិច្ចសហការប្រទេសទាំងពីរបន្ថែមទៀត លើវិស័យជាច្រើន ដូចជាវិស័យពាណិជ្ជកម្ម អប់រំ និងទេសចរណ៍ជាដើម។

សម្តេចធិបតី ហ៊ុន ម៉ាណែត លើកទឹកចិត្តដល់ ឯកឧត្តម Dhan Bahadur Oli សហការជាមួយក្រសួង និងស្ថាប័ន ដែលពាក់ព័ន្ធរបស់កម្ពុជា ដើម្បីជំរុញការធ្វើកិច្ចសហប្រតិបត្តិការឱ្យកាន់តែរីកចម្រើនបន្តទៀត។ សម្តេចធិបតីនាយករដ្ឋមន្រ្តី ក៏បានសរសើរពីទំនាក់ទំនងយូអង្វែងរវាងកម្ពុជា-នេប៉ាល់ ព្រមទាំងអបអរសាទចំពោះ ឯកឧត្តម Dhan Bahadur Oli ដែលទទួលបានការតែងតាំងជា ឯកអគ្គរដ្ឋទូតប្រចាំកម្ពុជា៕