ភ្នំពេញ៖ ក្រុមហ៊ុនចំនួន៥ របស់អាម៉េរិក មានបំណងវិនិយោគ និងភ្ជាប់ទំនាក់ទំនងជាមួយដៃគូធុរកិច្ចនៅកម្ពុជា ដើម្បីនាំចេញផលិតផលកសិកម្មពីកម្ពុជា ដូចជាអង្ករ ស្វាយចន្ទី ម្រេច និងស្វាយក្រៀម ទៅកាន់ទីផ្សារអាម៉េរិក។ នេះជាការបញ្ជាក់របស់លោក ផាទ្រីក មឺហ្វី (Patrick Murphy) តំណាងគណៈប្រតិភូធុរកិច្ចអាម៉េរិក ក្នុងគ្រាជួបជាមួយ សម្តេចធិបតី ហ៊ុន ម៉ាណែត។

ក្រៅពីការវិនិយោគនាំចេញផលិតផលកសិកម្ម លោក ផាទ្រីក មឺហ្វី ក៏មានទិសដៅជំរុញកិច្ចសហប្រតិបត្តិការក្នុងវិស័យអប់រំនៅកម្ពុជាផងដែរ ដោយក្នុងនោះ ក្រុមហ៊ុនមួយនៅអាម៉េរិកបានសម្រេចបង្កើតការិយាល័យតំណាងរបស់ខ្លួននៅកម្ពុជា ដើម្បីសម្រួលដល់និស្សិតកម្ពុជា ដែលចង់បន្តការសិក្សានៅអាម៉េរិក។

ពាក់ព័ន្ធនឹងការគ្រោងវិនិយោគរបស់ក្រុមហ៊ុនទាំង៥នេះ សម្ដេចធិបតីនាយករដ្ឋមន្រ្តី បានគាំទ្រ និងបានលើកឡើងពីការយកចិត្តទុកដាក់របស់រាជរដ្ឋាភិបាល ចំពោះវិស័យកសិកម្ម រួមមាន៖ កញ្ចប់លើកទឹកចិត្តផ្នែកពន្ធ, ការធ្វើទំនើបកម្មវិស័យកសិកម្ម, ការដាក់ពង្រាយមន្ត្រីបច្ចេកទេសតាមមូលដ្ឋាន, ការបង្កើតសហគមន៍កសិកម្មទំនើប ព្រមទាំងប្រព័ន្ធឡូជីស្ទីក និងហេដ្ឋារចនាសម្ព័ន្ធ ដែលចូលរួមកាត់បន្ថយថ្លៃដើម និងបង្កើនសមត្ថភាពប្រកួតប្រជែងនៃផលិតផលកសិកម្មរបស់កម្ពុជា។

នាឱកាសនោះដែរ សម្ដេចធិបតី ហ៊ុន ម៉ាណែត បានជំរុញឱ្យប្រតិភូធុរកិច្ចអាម៉េរិកបន្តផ្សារភ្ជាប់ទំនាក់ទំនង និងពិភាក្សាលម្អិតបន្ថែមទៀតជាមួយក្រសួង-ស្ថាប័នពាក់ព័ន្ធរបស់កម្ពុជា ដើម្បីចាប់យកឱកាសវិនិយោគ និងធុរកិច្ចក្នុងវិស័យកសិកម្ម វិស័យអប់រំ និងវិស័យសក្ដានុពលផ្សេងៗទៀត នៅកម្ពុជា។ នេះបើតាមការចុះផ្សាយរបស់សម្ដេចធិបតី ហ៊ុន ម៉ាណែត នាថ្ងៃទី១០ ខែកញ្ញា ឆ្នាំ២០២៤៕