ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ និងធនាគារចំនួន៨ បានចុះអនុស្សារណៈយោគយល់គ្នា ក្រោមអធិបតីភាពសម្តេចធិបតី ហ៊ុន ម៉ាណែត នាថ្ងៃទី៩ ខែសីហា ឆ្នាំ២០២៤។ តាមរយៈកិច្ចសហការនេះ ធនាគារទាំង៨ នឹងផ្តល់ឥណទានដល់ពលករ និងសិក្ខាកាមដែលទៅធ្វើការនៅបរទេស ត្រឹមអត្រាការប្រាក់៨,៥% ក្នុង១ឆ្នាំ ដែលអាចសន្សំបានជាមធ្យម១០% នៃអត្រាការប្រាក់ក្នុង ១ឆ្នាំ។

សម្តេចធិបតី ហ៊ុន ម៉ាណែត បានអរគុណដល់ក្រសួងការងារ ដែលបានខិតខំសម្របសម្រួលជាមួយធនាគារចំនួន៨ ដើម្បីគាំទ្រដល់ពលករ និងសិក្ខាកាម ដែលត្រូវការកម្ចីឱ្យទទួលបានទំហំឥណទានសមស្របជាមួយអត្រាការប្រាក់សមរម្យ និងមានលក្ខខណ្ឌឥណទានល្អប្រសើរ។ សម្តេចធិបតី ហ៊ុន ម៉ាណែត លើកឡើងថា ការផ្តល់កម្ចីក្នុងអត្រាការប្រាក់សមរម្យនេះ គឺដើម្បីផ្តល់ឱ្យពលករសម្រាប់ចំណាយលើការបំពេញឯកសារ និងសេវាកម្មផ្សេងៗ មុននឹងចេញដំណើរទៅធ្វើការនៅបរទេស។

ធនាគារទាំង៨ រួមមាន៖ ធនាគារ ខេប៊ីប្រាសាក់ ម.ក, ធនាគារ អ៊ូរី, ធនាគារប្រៃណីយ៍កម្ពុជា, ធនាគារកាណាឌីយ៉ា, ធនាគារ អេស៊ីលីដា, ធនាគារ វឌ្ឍនៈអាស៊ី ចំកាត់ (ABA), ធនាគារ វីង, ធនាគារ អេស ប៊ី អាយ លី ហួរ៕