សៀមរាប៖ មន្ទីរសាធារណការ និងដឹកជញ្ជូនខេត្តសៀមរាប ប្រកាសផ្អាកការធ្វើចរាចរណ៍ជាបណ្តោះអាសន្ន ចំពោះ រថយន្តធុនធំគ្រប់ប្រភេទ លើកំណាត់ផ្លូវជាតិ និងផ្លូវខេត្តមួយចំនួន ដោយសារស្ថានភាពជំនន់ទឹកភ្លៀងកំពុងជន់ឡើងខ្លាំង និងបង្កឱ្យលិចលង់ហេដ្ឋារចនាសម្ព័ន្ធផ្លូវថ្នល់មួយចំនួន។

យោងតាមសេចក្តីជូនដំណឹងរបស់ មន្ទីរសាធារណការ និងដឹកជញ្ជូនខេត្តសៀមរាប កំណាត់ផ្លូវដែលត្រូវផ្អាកចរាចរណ៍រថយន្តធុនធំ រួមមាន៖

- ផ្លូវជាតិលេខ៦៤ ក្នុងស្រុកស្វាយលើ

- ផ្លូវខេត្តលេខ៦២-៣ ចន្លោះបេងមាលា-ខ្វាវ

- ផ្លូវខេត្តលេខ២៦៧ ក្នុងសង្កាត់ស្វាយដង្គំ ក្រុងសៀមរាប

- ផ្លូវខេត្តលេខ២៦៤៥ ចន្លោះស្វាយលើ-វ៉ារិន

មន្ទីរសាធារណការ និងដឹកជញ្ជូនខេត្តសៀមរាប អំពាវនាវដល់សាធារណជន និងប្រជាពលរដ្ឋ ចូលរួមអនុវត្តតាមសេចក្តីជូនដំណឹងនេះ ដោយស្មារតីយោគយល់ ដើម្បីចូលរួមការពារហេដ្ឋារចនាសម្ព័ន្ធផ្លូវថ្នល់ និងសុវត្ថិភាពក្នុងការធ្វើដំណើរ។