ភ្នំពេញ៖ តាមរយៈកិច្ចព្រមព្រៀងដែលមានស្រាប់រវាងកម្ពុជា-កូរ៉េ សម្តេចធិបតី ហ៊ុន ម៉ាណែត បានស្នើឱ្យកូរ៉េពិចារណាកាត់បន្ថយអត្រាពន្ធនាំចូល ដែលកម្ពុជាបាននាំចេញផ្លែស្វាយពិសេសមួយប្រភេទទៅប្រទេសកូរ៉េ នឹងជំរុញឱ្យការនាំចូលស្វាយ ពិសេសផលិតផលកសិកម្មផ្សេងៗទៀតពីកម្ពុជា មកកូរ៉េ ឱ្យកាន់តែល្អ។ ការស្នើសុំរបស់សម្តេចធិបតី ហ៊ុន ម៉ាណែត បែបនេះ នៅក្នុងជំនួបពិភាក្សាការងារជាមួយឯកឧត្តម គីម ជីនផ្យូ ប្រធានរដ្ឋសភា នាថ្ងៃទី១៨ ខែឧសភា ឆ្នាំ២០២៤។

ក្នុងជំនួបនេះ សម្តេចធិបតី ហ៊ុន ម៉ាណែត បានមានប្រសាសន៍ថា ពាក់ព័ន្ធនឹងវិស័យសេដ្ឋកិច្ច និងពាណិជ្ជកម្ម ការចូលជាធរមាននៃកិច្ចព្រមព្រៀងពាណិជ្ជកម្មសេរីកូរ៉េ-កម្ពុជា និងការដំឡើងកម្រិតទំនាក់ទំនងទៅជា «ភាពជាដៃគូយុទ្ធសាស្រ្ត» នឹងរួមចំណែកជំរុញទំនាក់ទំនងទ្វេភាគី និងការធ្វើពាណិជ្ជកម្ម និងវិនិយោគបន្ថែមទៀតរវាងប្រទេសទាំងពីរ ក្នុងនោះ សម្ដេចធិបតី ហ៊ុន ម៉ាណែត ក៏បានបញ្ជាក់ពីសារសំខាន់នៃកិច្ចសហប្រតិបត្តិការលើវិស័យអាទិភាព ដូចជា៖ សេដ្ឋកិច្ច ពាណិជ្ជកម្ម ហេដ្ឋារចនាសម្ព័ន្ធ និងការអប់រំ។

ឯកឧត្តម គីម ជីនផ្យូ បានលើកឡើងថា ការដំឡើងកម្រិតទំនាក់ទំនងកូរ៉េ-កម្ពុជាដល់ «ភាពជាដៃគូយុទ្ធសាស្ត្រ» នឹងរួមចំណែកដល់ការជំរុញកិច្ចសហប្រតិបត្តិការរវាងប្រទេសទាំងពីរឱ្យកាន់តែល្អប្រសើរ និងរឹងមាំបន្ថែមទៀត ពិសេសជំរុញពាណិជ្ជកម្ម និងការវិនិយោគរវាងប្រទេសទាំងពីរ ឱ្យកាន់តែប្រសើរឡើង៕