ភ្នំពេញ៖ ស្ថានទូតសហរដ្ឋអាម៉េរិក ប្រចាំទីក្រុងភ្នំពេញ កំពុងស្វែងរកអាជីវករ និងក្រុមហ៊ុន ដែលមានគោលបំណងធ្វើធុរកិច្ចនាពេលអនាគត ជាមួយស្ថានទូតលើការផ្គត់ផ្គង់ទំនិញ និងសេវាកម្មផ្សេងៗ ខណៈដែលស្ថានទូតនេះ ធ្វើប្រតិបត្តិការលទ្ធកម្មធំមួយ ដែលមានការបញ្ជាទិញប្រចាំឆ្នាំក្នុងតម្លៃប្រហែល ៥លានដុល្លារ។ នេះបើតាមការចុះផ្សាយរបស់ស្ថានទូតសហរដ្ឋអាម៉េរិកប្រចាំកម្ពុជា នាថ្ងៃទី១៨ មេសា។

តាមសេចក្តីប្រកាសព័ត៌មាន ស្ថានទូតសហរដ្ឋអាម៉េរិក នឹងរៀបចំវេទិកាសម្រាប់អាជីវករ ក្រុមហ៊ុន និងឱកាសធុរកិច្ច ដើម្បីបង្កើនចំនួនអាជីវករ ក្រុមហ៊ុនដែលមានស្រាប់ និងជំរុញអាជីវករ ក្រុមហ៊ុនដែលមិនធ្លាប់ធ្វើការជាមួយស្ថានទូត ឱ្យមកចូលរួមក្នុងវេទិកានេះ ដើម្បីស្វែងយល់ពីឱកាសធុរកិច្ចជាមួយស្ថានទូត សហរដ្ឋអាម៉េរិក និងទាក់ទងនឹងដំណើរការលទ្ធកម្មលើទំនិញ និងសេវាកម្ម ដែលស្ថានទូតទិញជាប្រចាំ។

វេទិកានេះ នឹងធ្វើឡើងនៅថ្ងៃទី២៥ ខែមេសា ឆ្នាំ២០២៤ ម៉ោង១៥:00 - ១៧:00 រសៀល ខណៈដែល ទីកន្លែងរៀបចំវេទិកា ស្ថានទូត នឹងជម្រាបជូននៅពេលក្រោយ។ អាជីវករដែលមានបំណងចូលរួម អាចទាក់ទងមកការិយាល័យលទ្ធកម្មរបស់ស្ថានទូតសហរដ្ឋអាម៉េរិកតាមរយៈអ៊ីមែល PhnomPenhProcurement@state.gov ឱ្យបានត្រឹមថ្ងៃទី១៩ ខែមេសា ឆ្នាំ២០២៤៕