ភ្នំពេញ៖ កម្ពុជា និងសាធារណរដ្ឋប្រជាធិបតេយ្យទីម័រ-ឡេស្តេ ប្តេជ្ញាជំរុញកិច្ចសហប្រតិបត្តិការលើវិស័យទេសចរណ៍រវាងប្រទេសទាំងពីរ តាមរយៈការពន្លឿននីតិវិធីនៃការចុះអនុស្សរណៈនៃការយោគយល់គ្នានាពេលខាងមុខ បន្ទាប់ត្រូវបានលើកពេលកាលពីឆ្នាំ២០១៧ កន្លងទៅ។ 

ជាមួយគ្នានេះ ឯកឧត្តម FILIPUS NINO PEREIRA រដ្ឋមន្ត្រីក្រសួងពាណិជ្ជកម្មនិងឧស្សាហកម្ម នៃប្រទេសទីម័រ-ឡេស្តេ នឹងជម្រាបជូនឯកឧត្តម Francisco Kalbuadi Lay ឧបនាយករដ្ឋមន្ត្រីនិងរដ្ឋមន្ត្រីសម្របសម្រួលកិច្ចការសេដ្ឋកិច្ចនិងជារដ្ឋមន្ត្រីក្រសួងទេសចរណ៍និងបរិស្ថានទីម័រ-ឡេស្តេ ពិនិត្យនិងជំរុញនីតិវិធីបន្តឱ្យបានឆាប់រហ័ស។ 

ក្នុងឱកាសវេទិកាទេសចរណ៍អាស៊ាន ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អបអរសាទរចំពោះសាធារណរដ្ឋប្រជាធិបតេយ្យទីម័រ-ឡេស្តេ ដែលបានចូលជាសមាជិកទី១១ របស់អាស៊ាន និង កោតសរសើរចំពោះកិច្ចសហប្រតិបត្តិការដ៏ល្អប្រសើរលើគ្រប់វិស័យ និងនៅគ្រប់កម្រិត ជាពិសេសនៅកម្រិតថ្នាក់ដឹកនាំកំពូលរវាងប្រទេសទាំងពីរ៕