ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) និងក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន កំពុងស្វែងរកកាលានុវត្តភាពសហការគ្នាក្នុងការចូលរួមជំរុញទាក់ទាញការវិនិយោគជប៉ុនមកកម្ពុជា ដោយការប្រើប្រាស់យន្តការដែលមានស្រាប់។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី០៥ ខែមីនា ឆ្នាំ២០២៥។

យន្តការដែលមានស្រាប់នោះ មានដូចជា ការចូលរួមពង្រឹង និងពង្រីកមុខងាររបស់តុជប៉ុន តាមរយៈការបញ្ជូនជំនាញការជប៉ុនមកប្រចាំការនៅក្រុមប្រឹក្សាអភិវឌ្ឍន៍កម្ពុជា និងការផ្តល់ការកសាងសមត្ថភាពមន្ត្រីនៅក្រុមប្រឹក្សាអភិវឌ្ឍន៍កម្ពុជា និងក្រសួង-ស្ថាប័នពាក់ព័ន្ធមួយចំនួន ដើម្បីធ្វើឱ្យបរិស្ថានវិនិយោគនៅកម្ពុជា កាន់តែប្រសើរឡើងថែមទៀត។

គួរបញ្ជាក់ថា ការស្វែងរកកាលានុវត្តភាពនេះ ធ្វើឡើងក្នុងជំនួបពិភាក្សាការងាររវាងឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងគណៈប្រតិភូជប៉ុន ដឹកនាំដោយលោក ASAKURA Daisuke ប្រធាននាយកដ្ឋានទំនាក់ទំនងទ្វេភាគីសម្រាប់អាស៊ាននៃក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន៕