ភ្នំពេញ៖ កម្ពុជា-អូស្រ្តាលី នឹងពង្រីកទីផ្សារនាំចេញរបស់កម្ពុជា ការលើកកម្ពស់ទំនាក់ទំនងពាណិជ្ជកម្ម ការវិនិយោគ និងការបង្កើនសមត្ថភាពប្រកួតប្រជែងសម្រាប់សហគ្រាសធុនតូច និងមធ្យម (SMEs)។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី១៧ ខែកុម្ភៈ ឆ្នាំ២០២៥។

ក្នុងកិច្ចប្រជុំកាលពីថ្ងៃទី១១ ខែកុម្ភៈ ឆ្នាំ២០២៥ រវាងឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ ជាមួយលោកស្រី Kanu Negi តំណាងភាពជាដៃគូកម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) ក៏បានពិភាក្សាអំពីវឌ្ឍនភាពការងាររបស់ CAPRED ការរៀបចំទិសដៅយុទ្ធសាស្ត្រ និងផែនការសកម្មភាពសម្រាប់ឆ្នាំ២០២៥ផងដែរ។

ក្នុងកិច្ចប្រជុំនេះ ភាគីទាំងពីរ ក៏បានពិភាក្សាពីសមិទ្ធផលសំខាន់ៗ និងសកម្មភាពកំពុងដំណើរការ ជាពិសេសលើកិច្ចសហការជាមួយវិស័យឯកជន ការជំរុញការនាំចេញ និងការអភិវឌ្ឍហេដ្ឋារចនាសម្ព័ន្ធ ដែលវិស័យទាំងនេះត្រូវបានកំណត់ជាអាទិភាពសំខាន់សម្រាប់ការអភិវឌ្ឍសេដ្ឋកិច្ចរបស់កម្ពុជា។ ភាគីទាំងពីរ បានប្តេជ្ញាចិត្តពង្រឹងកិច្ចសហប្រតិបត្តិការក្នុងក្របខ័ណ្ឌ CAPRED ដោយលើកសំខាន់នូវអត្ថប្រយោជន៍នៃការពង្រឹងកិច្ចសហការយូរអង្វែង ប្រកបដោយនិរន្តរភាព៕