ភ្នំពេញ៖ រដ្ឋមន្ត្រីក្រសួងទេសចរណ៍ ឯកឧត្តម សុខ សូកេន ឱ្យមន្ទីរទេសចរណ៍រាជធានី-ខេត្តទាំងអស់ បំពេញព័ត៌មានស្ថិតិមូលដ្ឋានអាជីវកម្មសេវាកម្មទេសចរណ៍ និងផ្ញើរបាយការណ៍ស្ថិតិ មកកាន់ អគ្គនាយកដ្ឋានគ្រប់គ្រងឧស្សាហកម្មទេសចរណ៍ ជារៀងរាល់ខែ យ៉ាងយូរត្រឹមថ្ងៃទី០៧ បន្ទាប់ពីខែនីមួយៗ។

ដើម្បីចូលរួមពង្រឹងការចងក្រងស្ថិតិមូលដ្ឋានអាជីវកម្មសេវាកម្មទេសចរណ៍ទូទាំងរាជធានី-ខេត្ត ក្រសួង ទេសចរណ៍ ក៏បានស្នើឱ្យមន្ទីរទេសចរណ៍រាជធានី-ខេត្ត បំពេញការគ្រប់គ្រងកម្លាំងពលកម្មក្នុងឧស្សាហកម្មទេសចរណ៍ នៅក្នុងកម្មវិធី MS Excel។ មន្ទីរទេសចរណ៍រាជធានី-ខេត្ត ក៏ត្រូវស្នើសុំគោលការណ៍ឯកភាពពីរដ្ឋបាលរាជធានី-ខេត្ត លើទម្រង់ស្ថិតិមូលដ្ឋានអាជីវកម្មសេវាកម្មទេសចរណ៍ ដោយរួមបញ្ចូលទាំងការគ្រប់គ្រងនូវកម្លាំងពលកម្មក្នុងកម្មវិធី MS Excel ។

បើតាមសារាចរណែនាំស្តីពី ការធ្វើបច្ចុប្បន្នភាពស្ថិតិមូលដ្ឋានអាជីវកម្មសេវាកម្មទេសចរណ៍របស់ក្រសួងទេសចរណ៍ ដែលចេញផ្សាយនាថ្ងៃទី១៥ ខែឧសភា ឆ្នាំ២០២៤ មន្ទីរទេសចរណ៍រាជធានី-ខេត្ត អាចស្កេន QR CODE ដើម្បីទទួលបានទម្រង់របាយការណ៍ស្ថិតិមូលដ្ឋានអាជីវកម្មសេវាកម្មទេសចរណ៍ ក្នុងកម្មវិធី MS Excel ៕