ភ្នំពេញ៖ រោងចក្រ/ក្រុមហ៊ុនចំនួន៣៤៤ បន្ថែមទៀត ដែលមានកម្មករសរុប ៤៦ ២១២នាក់ បានចុះបញ្ជីសុំសិទ្ធនាំចេញទំនិញ ក្រោមនិងក្រៅប្រព័ន្ធអនុគ្រោះពាណិជ្ជកម្ម ក្នុងរយៈពេល ១១ខែ នៃឆ្នាំ២០២៤។ បើតាមរបាយការណ៍បូកសរុបលទ្ធផលការងារពាណិជ្ជកម្មឆ្នាំ២០២៤ របស់ក្រសួងពាណិជ្ជកម្ម បានឱ្យដឹងថា ការចុះបញ្ជីសុំសិទ្ធនាំចេញទំនិញនេះ មានការកើនឡើង ៤២,៧៤% បើធៀបនឹងរយៈពេលដូចគ្នាក្នុងឆ្នាំ២០២៣ ដែលមានរោងចក្រ/ក្រុមហ៊ុន ២៤១ក្រុមហ៊ុន។

ក្នុងចំណោមរោងចក្រ/ក្រុមហ៊ុនសរុប៣៤៤ ដែលបានចុះបញ្ជីសុំសិទ្ធនាំចេញទំនិញនេះ រួមមាន៖ រោងចក្រសម្លៀកបំពាក់ មានចំនួន៧៤ ដែលមានកម្មករសរុប ២៦ ៤១១នាក់ កើនឡើង ២៣,៣៣%, រោងចក្រស្បែកជើងមានចំនួន១៥ មានកម្មករ ៦ ០៣១នាក់ មានការកើនឡើង ៧,១៤%, រោងចក្រកាបូបមាន ២៥ កើនឡើង ៩២,៣១% ដែលមានកម្មករសរុប ៥ ២៣២នាក់, រោងចក្រផ្សេងៗមាន ១០៧រោងចក្រ ដែលកើនឡើង ៧៥,៤១% ក្នុងនោះកម្មករសរុប ៨ ៥៣៨នាក់ និងក្រុមហ៊ុនផ្សេងៗមានចំនួន ១២៣ក្រុមហ៊ុន ដោយកើនបាន ៣២,២៦%។

ក្រសួងពាណិជ្ជកម្ម បានឱ្យដឹងថា សម្រាប់ការចុះបញ្ជីស្នើសុំវិញ្ញាបនបត្របញ្ជាក់ដើមកំណើតទំនិញតាមប្រព័ន្ធអេឡិចត្រូនិកវិញ គឺសម្រេចបាន ១ ៣៧២ រោងចក្រឬក្រុមហ៊ុន កើនបាន១៨,៤៨%។ ក្នុងចំណោមរោងចក្រចំនួន ១ ៣៧២នេះ បានចុះបញ្ជីស្នើសុំវិញ្ញាបនបត្របញ្ជាក់ដើមកំណើតទំនិញតាមប្រព័ន្ធអេឡិចត្រូនិកថ្មី មានចំនួន ៣១៣ កើនឡើងជិត ៣៥% និងការចុះបញ្ជីស្នើសុំវិញ្ញាបនបត្របញ្ជាក់ដើមកំណើតទំនិញតាមប្រព័ន្ធអេឡិចត្រូនិកសារឡើងវិញមានចំនួន ១ ០៥៩ ដែលកើនឡើង ១៤,៣៦% នេះបើធៀបនឹងរយៈពេលដូចគ្នាក្នុងឆ្នាំ២០២៣៕