ភ្នំពេញ៖ ខេត្តបាត់ដំបង នឹងរៀបចំពិធីបុណ្យអុំទូក និងបណ្តែតប្រទីបនៅស្ទឹងសង្កែ ក្រុងបាត់ដំបង រយៈពេល២ថ្ងៃ ចាប់ពីថ្ងៃទី២៨-២៩ ខែតុលា ឆ្នាំ២០២៣ខាងមុខនេះ។ រដ្ឋបាលខេត្ត បានប្រាប់ពីគោលបំណងនៃការរៀបចំពិធីនេះ ដើម្បីអបអរសាទរពិធីបុណ្យចេញព្រះវស្សា, រួមចំណែកថែរក្សាទំនៀមទំលាប់ប្រពៃណីជាតិ និងទំនៀមទំលាប់របស់ខេត្តបាត់ដំបងផងដែរ។

ប្រភេទទូក ដែលនឹងចូលរួមប្រណាំងមានប្រភេទ ទូក-ង ខ្នាតប្រពៃណីជាតិ, ទូកខ្នាតអន្តរជាតិ, ទូកមង, ទូកផ្កាចារ និងពេលរាត្រីមានកម្មវិធីបណ្តែតប្រទីប បង្ហោះគោម និងបាញ់កាំជ្រួចជាដើម។ រដ្ឋបាលខេត្តបាត់ដំបង បានអំពាវនាវដល់សាធារណជន ភ្ញៀវទេសចរ និងប្រជាពលរដ្ឋក្នុងខេត្ត ចូលរួមលេងកម្សាន្តច្រើនកុះករ៕