ភ្នំពេញ៖ ប្រធានក្រុមប្រឹក្សាភិបាលនៃក្រុមហ៊ុន Booyoung Khmer II Co.,Ltd. លោកបណ្ឌិត Lee Joong Keun បានលើកឡើងក្នុងជំនួបជាមួយសម្តេចធិបតី ហ៊ុន ម៉ាណែត ថា ការសម្រេចចិត្តវិនិយោគរបស់ក្រុមហ៊ុន Booyoung នៅកម្ពុជា គឺមិនមែនក្នុងបំណងស្វែងរកប្រាក់ចំណេញសុទ្ធសាធទេ តែជាការរួមចំណែកជាមួយរាជរដ្ឋាភិបាលកម្ពុជាក្នុងការអភិវឌ្ឍសង្គម-សេដ្ឋកិច្ច និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។

ក្នុងជំនួបនេះ សម្តេចធិបតី ហ៊ុន ម៉ាណែត បានមានប្រសាសន៍ថា ក្រុមហ៊ុន Booyoung បានរួមចំណែកដល់ការអភិវឌ្ឍសង្គម-សេដ្ឋកិច្ចនៅកម្ពុជាជាច្រើន តាមរយៈការបណ្ដាក់ទុនវិនិយោគលើវិស័យមួយចំនួន រួមមាន វិស័យសំណង់ វិស័យធនាគារ និងវិស័យសក្ដានុពលផ្សេងទៀត ដែលជាចំណុចខ្លាំងនៃអាជីវកម្មរបស់ក្រុមហ៊ុន។ សម្ដេចធិបតី ហ៊ុន ម៉ាណែត បានបន្តថា ក្រុមហ៊ុន គួរតែបន្តជួបពិភាក្សាជាមួយក្រសួង ស្ថាប័នពាក់ព័ន្ធនៅកម្ពុជា ដើម្បីទទួលបានការសម្របសម្រួលលើកិច្ចការដែលនៅសេសសល់ និងពង្រីកឱកាសវិនិយោគលើវិស័យសក្ដានុពលផ្សេងៗទៀតនៅកម្ពុជា។

តាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី១៧ ខែឧសភា ឆ្នាំ២០២៤ បានបញ្ជាក់ថា ក្រុមហ៊ុន Booyoung Group គឺមានគម្រោងចំនួន៦ នៅកម្ពុជា ក្នុងវិស័យអចលនទ្រព្យ ហិរញ្ញវត្ថុ ការអប់រំ ទេសចរណ៍ (សណ្ឋាគារ និងទីលានវាយកូនហ្គោល) និងមានគម្រោងដែលគួរឱ្យកត់សម្គាល់មួយចំនួន ដូចជា បុរី ប៊ូយ៉ុង ថោន និងធនាគារ ប៊ូយ៉ុង ខ្មែរ៕