ភ្នំពេញ៖ ក្រសួងបរិស្ថាន មានគម្រោងរៀបចំតំបន់ការពារធនធានធម្មជាតិភ្នំគូលែន និងភ្នំណាមលៀរទៅជាសួនឧទ្យានភូគម្ភសាស្រ្ត (Go-Park) ដើម្បីអភិរក្សបេតិកភណ្ឌភូមិសាស្ត្ររបស់ផែនដី និងទាក់ទាញភ្ញៀវទេសចរជាតិ-អន្តរជាតិ។ នេះបើតាមការចុះផ្សាយរបស់ក្រសួងបរិស្ថាន នាថ្ងៃទី៨ ខែមិថុនា ឆ្នាំ២០២៤។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានលើកឡើងក្នុងគ្រាជួបពិភាក្សាការងារជាមួយលោកសាស្រ្តាចារ្យបណ្ឌិត Watanabe Koichiro ទីប្រឹក្សាជាន់ខ្ពស់ JICA ថា តំបន់ឧទ្យានអង្គវត្ត និងដែនជម្រកសត្វព្រៃ ភ្នំណាមលៀរ មានសក្តានុពល ដើម្បីជ្រើសរើសរៀបចំជាសួនឧទ្យានភូគម្ភសាស្រ្ត។ ការរៀបចំតំបន់នេះ ជាសួនឧទ្យានភូគម្ភសាស្រ្ត គឺដើម្បីបង្កើតជាគោលដៅលំហែបៃតងថ្មីទាក់ទាញភ្ញៀវទេសចរជាតិ-អន្តរជាតិ និងបម្រើដល់ការសិក្សាស្រាវជ្រាវរបស់សិស្ស-និស្សិតផងដែរ។

លោកសាស្រ្តាចារ្យបណ្ឌិត Watanabe Koichiro បានគាំទ្រដល់បេក្ខភាពនៃតំបន់ការពារធម្មជាតិទាំងពីរខាងលើ និងបានស្នើដល់ក្រសួងបរិស្ថានរៀបចំក្រុមការងារ ដើម្បីសិក្សាលទ្ធភាពលើតំបន់ការពារធម្មជាតិទាំងពីរនេះ និងបណ្តាតំបន់ការពារធម្មជាតិផ្សេងៗទៀត៕