ភ្នំពេញ៖ សប្ដាហ៍ភាពយន្តចិននៅកម្ពុជា ត្រូវបានសម្ពោធបើកជាផ្លូវការ នៅសាលសន្និសីទចតុម្មុខ ដែលសហការរៀបចំដោយ រដ្ឋបាលភាពយន្ត ក្រសួងវប្បធម៌ និងវិចិត្រសិល្បៈ គណៈកម្មការរៀបចំមហោស្រពភាពយន្តកម្ពុជាអាស៊ី និងបណ្ណសាភាពយន្តចិន។ នេះតាមការចុះផ្សាយរបស់ក្រសួងវប្បធម៌ និងវិចិត្រសិល្បៈ កាលពីថ្ងៃទី១៧ ខែមេសា ឆ្នាំ២០២៥។

ព្រឹត្តិការណ៍សប្ដាហ៍ភាពយន្តចិននៅកម្ពុជានេះ នឹងប្រារព្ធទៅរយៈពេល ៥ថ្ងៃ ដែលមានការចាក់បញ្ចាំងភាពយន្តល្បីៗចំនួន ៥ចំណងជើង នៅរោងភាពយន្តឡេជេន អូឡាំព្យាម៉ល ដោយទស្សនិកជនអាចទស្សនាដោយសេរី។ ក្នុងពីធីសម្ពោធជាផ្លូវ ដែលចូលរួមដោយឯកឧត្ដម Shen Haixiong អនុរដ្ឋមន្ត្រីនៃក្រសួងឃោសនាការនៃគណៈកម្មាធិការមជ្ឈិមបក្សកុម្មុយនីស្តចិន លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ បានលើកឡើងថា កម្ពុជា-ចិន មានទំនាក់ទំនងជាប្រពៃណីដែលបានចាប់ផ្ដើមយូរមកហើយ នឹងក៏មានវប្បធម៌អរិយធម៌ដ៏ចំណាស់និងអស្ចារ្យរៀងៗខ្លួនផងដែរ។

លោកជំទាវ ភឿង សកុណា បន្តថា ទំនាក់ទំនងកម្ពុជា-ចិន គឺបានឈានដល់កម្រិតដ៏សំខាន់មួយជា «សហគមន៍ជោគវាសនារួមគ្នាកម្ពុជា-ចិន» ខណៈដែល «កិច្ចសហប្រតិបត្តិការត្បូងពេជ្រ» ជាអាទិភាពខ្ពស់លើទំនាក់ទំនងកម្ពុជា-ចិន បានឈានដល់កម្រិតខ្ពស់ថ្មីមួយទៀត ដើម្បីលើកកម្ពស់សន្តិភាព ស្ថិរភាព និងវិបុលភាព៕