ភ្នំពេញ៖ ផលិតផលទឹកដោះគោចំនួន ២១២ កេស ស្មើនឹង ១០,៦០០ដប ទម្ងន់សរុប ៩,៥៤០គីឡូក្រាម ត្រូវបានមន្រ្តីអធិការកិច្ចម្ហូបអាហារនៃសាខា ក.ប.ប. ខេត្តបាត់ដំបង សហការជាមួយមន្រ្តីនគរបាលប្រឆាំងបទល្មើសសេដ្ឋកិច្ចខេត្តបាត់ដំបង តំណាងក្រុមហ៊ុន UNT ដុតកម្ទេចចោល កាលពីថ្ងៃទី១៧ ខែមីនា ឆ្នាំ២០២៥។

មន្ត្រីជំនាញខេត្តបាត់ដំបង បានឱ្យដឹងថា ទំនិញទឹកដោះគោស្រស់នេះ គឺដឹកជញ្ជូនពុំមានលក្ខណៈសមស្របតាមលក្ខខណ្ឌតម្រូវសម្រាប់មនុស្សបរិភោគ ដែលដឹកជញ្ជូនពុំបានត្រឹមត្រូវ ដោយកម្លាំងសមត្ថកិច្ចជំនាញនគរបាលប្រឆាំងបទល្មើសសេដ្ឋកិច្ចចាប់ឃាត់ទុកបាន។

ការដុតកម្ទេចទឹកដោះគោស្រស់ជាង ៩តោននេះ ធ្វើឡើងនៅទីលានចាក់សំរាម ភូមិអូរមុនី១ ឃុំអន្លង់វិល ស្រុកសង្កែ ខេត្តបាត់ដំបង ក្រោយទទួលបានគោលការណ៍អនុញ្ញាតពីឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង៕