ភ្នំពេញ៖ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ ពិភាក្សារៀបចំកសិករស្រុកម៉ោងឫស្សី ខេត្តបាត់ដំបង ចងក្រងជាសហគមន៍កសិកម្មទំនើបសម្រាប់ដំណាំស្រូវនៅរដូវកាលខាងមុខ ដោយមានការចុះកិច្ចសន្យាថ្លៃទុកជាមុនច្បាស់លាស់។

ឯកឧត្តម ឃឹម ហ្វីណង់ ពិតជាសប្បាយចិត្ត ដែលបានឃើញប្រជាកសិករកាន់តែច្រើនចាប់ផ្តើមយល់ពីអត្ថប្រយោជន៍ នៃការរួមផលិតជាសហគមន៍កសិកម្មទំនើប និងបានស្ម័គ្រចិត្តជ្រើសរើសការបង្កើនផលដែលមានការធានាថ្លៃទុកជាមុនរឹងមាំ ដើម្បីការពារខ្លួនពីហានិភ័យទីផ្សារ។

ក្រុមការងារក្រសួងកសិកម្ម គ្រោងនឹងត្រលប់មកខេត្តបាត់ដំបងម្តងទៀត នៅថ្ងៃសុក្រសប្តាហ៍នេះ ដើម្បីបន្តរៀបចំសហគមន៍កសិកម្មទំនើបបន្ថែមទៀត ជូនដល់បងប្អូនកសិករតាមសំណូមពរ។ នេះបើតាមការចុះផ្សាយរបស់ ឯកឧត្តម ឃឹម ហ្វីណង់ នាថ្ងៃទី២១ ខែសីហា ឆ្នាំ២០២៥៕