ភ្នំពេញ៖ ការចងក្រងគ្នាទៅជា «សហគមន៍កសិកម្មទំនើប» ជាដំណោះស្រាយបញ្ហាខ្វះខាតការបង្កបង្កើនផល និងបញ្ហាខ្វះខាតទឹកប្រកបដោយសមធម៌ និងមានប្រសិទ្ធភាពសេដ្ឋកិច្ចខ្ពស់ តាមរយៈការទទួលបានកិច្ចអន្តរាគមន៍ដោយផ្ទាល់ ការវិនិយោគលើហេដ្ឋារចនាសម្ព័ន្ធ ទទួលបានទុនកម្ចី និងការគាំទ្រផ្នែកបច្ចេកទេស។ នេះជាប្រសាសន៍របស់ ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ។

ក្នុងពេលជជែកគ្នាជាមួយលោកមេភូមិ មេឃុំ និងតំណាងអាជ្ញាធរមូលដ្ឋានទាំងអស់ ក្នុងស្រុកមង្គលបូរី ខេត្តបន្ទាយមានជ័យ ឯកឧត្តម ឃឹម ហ្វីណង់ លើកឡើងដូច្នេះថា៖ «ការចងក្រងសហគមន៍កសិកម្មទំនើប គឺត្រូវចាប់ផ្តើមពីអាជ្ញាធរមូលដ្ឋានរបស់យើងសិន ដោយអាចនិយាយផ្សព្វផ្សាយ និងពន្យល់ពីគោលនយោបាយនេះ បន្តទៅកាន់ប្រជាកសិករក្នុងសម្លេង និងទិសដៅតែមួយ ជៀសវាងនូវការយល់ច្រលំពីកម្មវិធីដ៏មានសារសំខាន់នេះ»៕