ភ្នំពេញ៖ ក្រសួងរ៉ែ និងថាមពល បានចុះប្រតិបត្តិការបង្ក្រាបតំបន់រ៉ែអនាធិបតេយ្យ នៅតំបន់ឈើភ្លើង ស្ថិតក្នុងភូមិភ្នំដែក ឃុំរមទម ស្រុករវៀង ខេត្តព្រះវិហារ។ បើតាមការចុះផ្សាយកាលពីថ្ងៃទី២៣ ខែមិថុនា ឆ្នាំ២០២៤ ក្រសួងរ៉ែ បានសហការជាមួយរដ្ឋបាលខេត្តព្រះវិហារ បំផ្លាញអណ្តូងរ៉ែបញ្ឈរចំនួន ៣រណ្តៅ និងរោងស្នាក់នៅចំនួន១។

រណ្តៅចំនួន៣ ដែលមន្រ្តីជំនាញបានបំផ្លាញនោះមាន៖ រណ្ដៅទី១ មានទំហំ ១ម៉ែត្រ x ៣ម៉ែត្រ ដែលមានជម្រៅ ៣ម៉ែត្រ, រណ្ដៅទី២ មានទំហំ ២ម៉ែត្រ x ៥ម៉ែត្រ និងមានជម្រៅ ៥ម៉ែត្រ, រណ្ដៅទី៣ ទំហំ ១ម៉ែត្រx ១,៥ម៉ែត្រ និងមានជម្រៅ ៣ម៉ែត្រ និងរោងស្នាក់នៅទំហំ ៣ម៉ែត្រ x ៨ម៉ែត្រ។

ក្រសួងរ៉ែ និងថាមពល អំពាវនាវដល់ប្រជាពលរដ្ឋដែលកំពុងធ្វើអាជីវកម្មរ៉ែអនាធិបតេយ្យឱ្យបញ្ឈប់នូវរាល់សកម្មភាពខុសច្បាប់ទាំងនោះ។ ក្រសួងរ៉ែ និងថាមពល ជំរុញឱ្យពលរដ្ឋចូលរួមទប់ស្កាត់សកម្មភាពទាំងនេះ តាមរយៈការជូនដំណឹងអំពីសកម្មភាពរ៉ែអនាធិបតេយ្យមកក្រសួងរ៉ែ និងថាមពល តាមលេខទូរសព្ទ ០៩៥ ៧២៧ ៧២៧៕