ភ្នំពេញ៖ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា លើកទឹកចិត្តឱ្យសមាគមសហគ្រិន Shaoxing មកពីទីក្រុងសាវស៊ីង ខេត្តចឺជាំង ប្រទេសចិន បណ្តាក់ទុនវិនិយោគនៅកម្ពុជា ក្នុងវិស័យអាទិភាព ពិសេសវិស័យកសិ-ឧស្សាហកម្ម និងពិចារណាបង្កើតតំបន់សេដ្ឋកិច្ចពិសេសនៅកម្ពុជា។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា(CDC) នាថ្ងៃទី២៧ ខែវិច្ឆិកា ឆ្នាំ២០២៤។

ក្នុងជំនួបជាមួយគណៈប្រតិភូសមាគមសហគ្រិន Shaoxing ដឹកនាំដោយលោក CHE Fei ប្រធានសមាគម និងជាប្រធានក្រុមហ៊ុន Shaoxing Muhua Wood Industry Co., Ltd ឯកឧត្តម ជា វុទ្ធី បានលើកឡើងថា កម្ពុជា មានសក្តានុពលខ្ពស់ក្នុងវិស័យកសិកម្ម និងមានដំណាំយុទ្ធសាស្រ្តជាច្រើន រួមមានស្រូវ ដំឡូងមី និងស្វាយចន្ទីជាដើម ដែលទាមទារឱ្យមានការវិនិយោគកែច្នៃក្នុងស្រុកដើម្បីបង្កើតតម្លៃបន្ថែម។

ជាមួយគ្នានេះ លោក CHE Fei ក៏បានលើកឡើងថា សមាសភាពគណៈប្រតិភូសមាគម មានសកម្មភាពអាជីវកម្មក្នុងវិស័យជាច្រើន ដូចជា ឧស្សាហកម្មកែច្នៃឈើ, បោះពុម្ព, អចលនទ្រព្យ, ឧស្សាហកម្ម, សំណង់, អប់រំ, ថាមពល, បច្ចេកវិទ្យា និងប្រព័ន្ធផ្សព្វផ្សាយ។ ឯកឧត្តម ជា វុទ្ធី ក៏ស្នើសុំឱ្យគណៈប្រតិភូជួយផ្សព្វផ្សាយពីសក្តានុពល និងបរិស្ថានវិនិយោគប្រកបដោយភាពអំណោយផល និងមានភាពប្រកួតប្រជែងខ្ពស់របស់កម្ពុជាទៅដល់វិនិយោគិនចិន និយាយជារួម និងទៅដល់វិនិយោគិននៅខេត្តចឺជាំង៕