ភ្នំពេញ៖ «ប្រព័ន្ធកុំព្យូទ័រក្លោដ» សំដៅលើការផ្តល់សេវាកុំព្យូទ័រតាមអ៊ីនធឺណិត ដែលអនុញ្ញាតឱ្យអ្នកប្រើប្រាស់អាចចូលទៅប្រើប្រាស់ធនធានកុំព្យូទ័រ ដូចជា Servers, Storage, Databases, Networking, Software, Analytics និង Intelligence ដោយពុំចាំបាច់មានការអនុញ្ញាត ឬលំបាកក្នុងការរក្សាហេដ្ឋារចនាសម្ព័ន្ធរូបវន្តទៀត។

ប្រព័ន្ធកុំព្យូទ័រក្លោដ មាន ៣ប្រភេទ រួមមាន៖ ប្រភេទទី១. Private Cloud Computing គឺជាប្រភេទនៃប្រព័ន្ធកុំព្យូទ័រក្លោដ ដែលផ្តល់ការគ្រប់គ្រងទិន្នន័យមានលក្ខណៈជាឯកជនភាព និងពេញនិយមប្រើប្រាស់ក្នុងចំណោមអាជីវកម្ម សហគ្រាស និងឧស្សាហកម្ម ដែលទាមទារនូវប្រព័ន្ធគ្រប់គ្រងទិន្នន័យមានកម្រិតសុវត្ថិភាពខ្ពស់។

ប្រភេទទី២. Public Cloud Computing ជាប្រព័ន្ធកុំព្យូទ័រក្លោដ ដែលហេដ្ឋារចនាសម្ព័ន្ធ ថ្នាល និងSoftware បង្កើតដោយក្រុមហ៊ុនផ្តល់សេវាកម្មកុំព្យូទ័រក្លោដ ដូចជា Google Cloud, Alibaba Cloud និងAmazon ជាដើម ដែលលក់សេវាកម្មប្រព័ន្ធកុំព្យូទ័រក្លោដដល់ស្ថាប័ន ក៏ដូចជាអាជីវកម្មក្នុងការទិញយកសេវាកម្មទាំងនេះទៅធ្វើការគ្រប់គ្រងអាជីវកម្មរបស់ពួកគេ។

ប្រភេទទី៣. Hybrid Cloud Computing គឺជាការរួមបញ្ចូលរវាង Private Cloud Computing និង Public Cloud Computing ដើម្បីបង្កើតប្រព័ន្ធកុំព្យូទ័រក្លោដចម្រុះមួយ ដែលអាចដំណើរការរលូន និងមានភាពបត់បែនខ្ពស់ទៅតាមតម្រូវការរបស់ស្ថាប័ន និងអាជីវកម្ម៕