ភ្នំពេញ៖ រដ្ឋបាលស្រុកមេសាង ខេត្តព្រៃវែង បានប្រាប់ឱ្យអាជីវករប្រកបមុខរបរលក់ដូរម្ហូបអាហារ ភាសជ្ជៈដែលមានតូប ឬកញ្ចុះដែលមានបិទបាំង ត្រូវតែរុះរើរបាំង ឬសំយ៉ាបទាំងនោះចេញ ដើម្បីនេះ ដើម្បីចូលរួមអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ប្រកបដោយប្រសិទ្ធភាព ព្រមទាំងចូលលើកកម្ពស់ប្រសិទ្ធភាពក្នុងការរៀនសូត្ររបស់សិស្សានុសិស្ស។

យោងតាមសេចក្តីប្រកាសរបស់រដ្ឋបាលស្រុកមេសាង នៅថ្ងៃទី០៨ ខែកញ្ញា ឆ្នាំ២០២៣ មត្រូវឱ្យអាជីវករទាំងនោះរុះរើដោយខ្លួនឯង ចាប់ពីថ្ងៃជូនដំណឹងនេះតទៅ និងឱ្យម្ចាស់អាជីវកម្មចូលរួមសហការរាយការណ៍មកអាជ្ញាធរមូលដ្ឋាន និងសមត្ថកិច្ច ក្នុងករណីដែលមានសិស្សានុសិស្សមិនចូលរៀន ឬទៅជួបជុំប្រមូលផ្តុំគ្នានៅតាមតូប ឬកញ្ចុះ ដើម្បីសមត្ថកិច្ចយកសិស្សិទាំងនោះមកអប់រំណែនាំ។

សេចក្តីប្រកាសរបស់រដ្ឋបាលស្រុកមេសាង បានសរសេរបញ្ជាក់ដោយសង្ឃឹមថា អាជីវករទាំងអស់នឹងចូលរួមសហការជាមួយអាជ្ញាធរគ្រប់លំដាប់ថ្នាក់ ដើម្បីចូលរួមចំណែកក្នុងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ឱ្យបានទទួលលទ្ធផលល្អប្រសើរ នៅក្នុងមូលដ្ឋានស្រុកមេសាងយើងទាំងមូល៕