ភ្នំពេញ៖ កម្ពុជា រកចំណូលពីការលក់សំបុត្រជូនភ្ញៀវអន្តរជាតិចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀស បានចំណូលសរុប ៣៧ ១៩៨ ៩៨៨លានដុល្លារអាម៉េរិក ក្នុងរយៈពេល១២ខែ ឆ្នាំ២០២៣។

យោងតាមសេចក្តីប្រកាសព័ត៌មានរបស់គ្រឹះស្ថានអង្គរនាថ្ងៃទី០១ ខែមករា ឆ្នាំ២០២៤ រយៈពេលពេញមួយឆ្នាំ២០២៣ រមណីយដ្ឋានអង្គរ ទទួលបានភ្ញៀវអន្តរជាតិសរុប ៧៩៨ ០៦៩នាក់ កើនឡើង ១៧៧,៦៣ភាគរយ ធៀបនឹងឆ្នាំ២០២២ និងរកចំណូលសរុបបាន ៣៧ ១៩៨ ៩៨៨ដុល្លារអាម៉េរិក កើនឡើង ២២២,៦៨ភាគរយ ធៀបនឹងរយៈពេលពេញមួយឆ្នាំ ក្នុងឆ្នាំ២០២២។

ចំណែក ការលក់បណ្ណឱ្យភ្ញៀវទេសចរអន្តរជាតិចូលទស្សនាប្រាសាទកោះកែរ ក្នុងឆ្នាំ២០២៣ មានចំនួន ១៤ ៨០៦នាក់ ស្មើនឹង ២២២ ០៩០ដុល្លារអាម៉េរិក ខណៈការលក់សំបុត្រទូកវិញ គ្រឹះស្ថានអង្គរទទួលបានចំណូល ៥៦៤ ៦៧១ដុល្លារអាម៉េរិក ក្នុងនោះទូកសរុបមានចំនួន ២១ ៤៧៨។

គួរបញ្ជាក់ថា ខែធ្នូឆ្នាំ២០២៣ មានភ្ញៀវបរទេសចូលទស្សនារមណីយដ្ឋានអង្គរមានចំនួន ៩៨ ០៧៣នាក់ កើនឡើង៥៧,៥១ភាគរយ ធៀបនឹងខែធ្នូ ឆ្នាំ២០២២ ដែលរកចំណូលបាន ៤ ៦៥២ ១៤១ដុល្លារអាម៉េរិក កើនឡើង ៨៤,៩៥ភាគរយ ធៀបនឹងខែធ្នូ ឆ្នាំ២០២២៕