ភ្នំពេញ៖ «ស្របតាមគោលនយោបាយអាទិភាពទី៥ និងទី៦ តួនាទី និងភារកិច្ចមន្ត្រីកសិកម្មឃុំ ការអភិវឌ្ឍសហគមន៍កសិកម្មទំនើប គឺជាគន្លឹះដោះស្រាយបញ្ហាប្រឈមរបស់កសិករ លើបច្ចេកទេស ទុន និងទីផ្សារ ដើម្បីធានាបានលើការបង្កើនប្រាក់ចំណេញ»។ នេះជាប្រសាសន៍របស់ ឯកឧត្តមបណ្ឌិត យ៉ង សាំងកុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ។

ក្នុងពិធីបើកវគ្គបណ្តុះបណ្តាលស្តីអំពី «ខ្សែច្រវាក់ផលិតកម្មដំណាំស្វាយចន្ទី និងម្រេច» ដល់មន្រ្តីកសិកម្មឃុំ និងកសិករបង្គោល ដែលមកពីខេត្តកំពង់ធំ និងខេត្តក្រចេះ ឯកឧត្តមបណ្ឌិត យ៉ង សាំងកុមារ បញ្ជាក់ថា ការបណ្តុះបណ្តាលនេះ ជាការចូលរួមចំណែកពង្រឹងសមត្ថភាពប្រតិបត្តិការងាររបស់មន្រ្តីកសិកម្មឃុំ-សង្កាត់ ធ្វើការបម្រើកសិករ លើកស្ទួយប្រាក់ចំណូលពីផលិតកម្មកសិកម្ម ពិសេសផលិតកម្មស្វាយចន្ទី និងម្រេច ដែលជាដំណាំមានសារសំខាន់សម្រាប់សេដ្ឋកិច្ចជាតិ និងជីវភាពកសិករ។

ដំណាំស្វាយចន្ទី និងម្រេច ជាកសិផលអាទិភាព ចូលរួមចំណែកបង្កើនសេដ្ឋកិច្ច និងប្រាក់ចំណូលកសិករ ស្របតាមគោលនយោបាយ «មានហូប មានបាន មានប្រើ និងមានរហូត» របស់ក្រសួងកសិកម្ម រុក្ខាប្រមាញ់ និងនេសាទ។ នេះជាការលើកឡើងរបស់ ឯកឧត្តមបណ្ឌិត យ៉ង សាំងកុមារ រដ្ឋលេខាធិការ ក្រសួងកសិកម្ម៕