ភ្នំពេញ៖ អ្នកឧកញ៉ា លី ឃុនថៃ អនុប្រធានសភាពាណិជ្ជកម្មកម្ពុជា លើកទឹកចិត្តវិនិយោគិនចិន បណ្តាក់ទុនវិនិយោគនៅកម្ពុជាបន្ថែម ព្រោះកម្ពុជា គឺជាគោលដៅវិនិយោគដ៏ទាក់ទាញសម្រាប់វិនិយោគិនចិន និងជាទីតាំងយុទ្ធសាស្ត្រក្នុងតំបន់អាស៊ាន ដែលមានកម្លាំងពលកម្មវ័យក្មេង ទទួលបានទីផ្សារអនុគ្រោះ និងបរិយាកាសធុរកិច្ចដ៏ល្អប្រសើរ ដែលសមស្របបំផុតសម្រាប់ការវិនិយោគ។

ក្នុងជំនួបជាមួយ លោក ហ៊ូ យូសុង ប្រធានប្រតិបត្តិនៃសភាពាណិជ្ជកម្ម ឆ្លងដែន តំបន់ពាណិជ្ជកម្មសេរីហៃណាន ដែលបានដឹកនាំគណៈប្រតិភូធុរកិច្ចខេត្តហៃណាន មកទស្សនកិច្ចនៅកម្ពុជា ក្នុងគោលបំណងជំរុញទំនាក់ទំនងសេដ្ឋកិច្ច អ្នកឧកញ៉ា លី ឃុនថៃ បានស្វាគមន៍ និងគូសបញ្ជាក់អំពីសារសំខាន់ជាយុទ្ធសាស្ត្ររបស់ខេត្តហៃណាន ដែលជាកំពង់ផែពាណិជ្ជកម្មសេរី មានសក្តានុពលខ្ពស់សម្រាប់កិច្ចសហប្រតិបត្តិការរួមគ្នា ដែលផ្តល់ផលប្រយោជន៍ទៅវិញទៅមក។

ក្នុងជំនួបនោះផងដែរ ភាគីទាំងពីរ បានឯកភាព និងកំណត់នូវក្របខ័ណ្ឌកិច្ចសហប្រតិបត្តិការរួម ក្នុងការជំរុញទំនាក់ទំនាក់ទំនងធុរកិច្ច។ គួរបញ្ជាក់ថា សភាពាណិជ្ជកម្មកម្ពុជា នឹងរៀបចំទស្សនកិច្ចធុរកិច្ចទៅកាន់ខេត្តហៃណាន ប្រទេសចិន ក្នុងពេលសមស្របខាងមុខ ដើម្បីពិភាក្សាលម្អិតជាមួយ សភាពាណិជ្ជកម្មឆ្លងដែន តំបន់ពាណិជ្ជកម្មសេរីហៃណាន។ នេះបើតាមការចុះផ្សាយរបស់ សភាពាណិជ្ជកម្មកម្ពុជា នាថ្ងៃទី២៤ ខែមេសា ឆ្នាំ២០២៥៕