ភ្នំពេញ៖ កម្ពុជា-ហ្វីលីពីន ឯកភាពបង្កើនកិច្ចសហការវិស័យពាណិជ្ជកម្ម ដោយធ្វើយ៉ាងណាបង្កើនទំហំពាណិជ្ជកម្មទ្វេភាគី ទាំងពាណិជ្ជកម្មទំនិញ និងពាណិជ្ជកម្មសេវាកម្ម។ កិច្ចពិភាក្សាឯកភាពនេះ ធ្វើឡើងដោយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងលោកជំទាវ Flerida Ann Camille P. Mayo ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋហ្វីលីពីន ប្រចាំកម្ពុជា។

ក្នុងការបង្កើនទំហំពាណិជ្ជកម្មទ្វេភាគីនេះ ភាគីហ្វីលីពីន មានបំណងមកធ្វើធុរកិច្ចលើវិស័យមួយចំនួន ដូចជា៖ សេវាអប់រំនិងបណ្ដុះបណ្ដាល សិទ្ធិអាជីវកម្ម សុខាភិបាលនិងថែទាំ សាងសង់ និងការផលិតនិងលក់ដូរចំណីអាហារនៅកម្ពុជា។ ក្រៅពីនេះ កម្ពុជា-ហ្វីលីពីន ក៏បានពិភាក្សាលើការពេញចិត្តកិច្ចសហប្រតិបត្តិការលើវិស័យពាណិជ្ជកម្ម ក្នុងថ្នាក់តំបន់ផងដែរ។

លោកជំទាវ Flerida Ann Camille P. Mayo បានអរគុណដល់រាជរដ្ឋាភិបាលកម្ពុជា ពិសេសក្រសួងពាណិជ្ជកម្ម ដែលខិតខំបង្កើតនូវបរិយាកាសអំណោយផលដល់សហគមន៍ធុរកិច្ចរបស់ហ្វីលីពីន ដែលកំពុងធ្វើធុរកិច្ចនៅកម្ពុជា។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី០៥ ខែកញ្ញា ឆ្នាំ២០២៤៕