ភ្នំពេញ៖ ឯកឧត្តម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានចុះជ្រមុជទឹកនៅតំបន់កោះអាចម៍សេះ ដែលសម្បូរទៅដោយស្មៅសមុទ្រ ដើម្បីពិនិត្យការងារអភិរក្សធនធានជលផល និងប្រព័ន្ធជីវចម្រុះបាតសមុទ្រ របស់អង្គការអភិរក្សធនធានសមុទ្រកម្ពុជា (MCC)។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ នាថ្ងៃទី១៨ ខែមេសា ឆ្នាំ២០២៤។

ក្នុងការចុះផ្សាយដដែល បានបញ្ជាក់ថា ស្មៅសមុទ្រដែលលូតលាស់នៅតំបន់កោះអាចម៍សេះ ដែលស្ថិតក្នុងខេត្តកែប បង្កើតបានជាប្រព័ន្ធអេកូឡូស៊ីដ៏ប្រសើរសម្រាប់ពពួកសត្វគ្រប់ប្រភេទ ជាពិសេសសម្រាប់សត្វជ្រូកទឹកដែលចាប់ផ្ដើមលេចមុខឡើងវិញនៅតំបន់នេះ។ ជាមួយគ្នានេះ ឯកឧត្តមរដ្ឋមន្ដ្រីក្រសួងកសិកម្ម បានលើកឡើងថា ការងាររបស់អង្គការ MCC សហការជាមួយរដ្ឋបាលជលផល បានរួមចំណែកជួយស្ដារឡើងវិញនូវធនធានជលផល និងប្រព័ន្ធជីវចម្រុះបាតសមុទ្រ។

ឯកឧត្តមរដ្ឋមន្ដ្រី ឌិត ទីណា ក៏បានផ្ដល់អនុសាសន៍ដល់អង្គការ MCC បន្តអនុវត្តការងាររបស់ខ្លួនឱ្យមានប្រសិទ្ធភាព និងត្រូវសហការឱ្យបានជិតស្និទ្ធជាមួយរដ្ឋបាលជលផល និងអាជ្ញាធរមូលដ្ឋាន ដើម្បីនិរន្ដរភាពនៃធនធានជលផល និងប្រព័ន្ធជីវចម្រុះបាតសមុទ្ររបស់កម្ពុជា៕