ភ្នំពេញ៖ អាជីវកម្ម ដែលទទួលបានជោគជ័យលើការចុះបញ្ជីតាមថ្នាលបច្ចេកវិទ្យាព័ត៌មាន(CamDx) ដំណាក់កាលទី១ មានចំនួន ៣៦,៦៧៧ក្រុមហ៊ុន និងមានដើមទុនសរុប ១៩,៤៣ប៊ីលានដុល្លារ គិតត្រឹមថ្ងៃទី៩ ខែមិថុនា ឆ្នាំ២០២៤។ នេះបើយោងតាម Online Business Registration Service (OBRS)។

បើយោងតាម OBRS ចេញផ្សាយកាលពីថ្ងៃទី០៩ មិថុនា បានបញ្ជាក់ថា អាជីវកម្មដែលមានដើមទុនវិនិយោគចុះបញ្ជីច្រើនជាងគេ រួមមាន៖ ការសាងសង់អាគារមានចំនួន ១,១៨ ប៊ីលានដុល្លារ ស្មើនឹង១០,៤៩%, សកម្មភាពអចលនទ្រព្យមានទុនវិនិយោគ ១,១៣ប៊ីលានដុល្លារ ស្មើ ១០,០៤%, សកម្មភាពសេវាកម្មស្នាក់នៅមានទុន ១,០២ប៊ីលានដុល្លារ ស្មើនឹង ៩,០៨%, សកម្មភាពពិគ្រោះយោបល់ផ្នែកគ្រប់គ្រងមានទំហំវិនិយោគ ៦២៣លានដុល្លារ ត្រូវនឹង ៥,៥២%, កម្មន្តសាលសម្លៀកបំពាក់ លើកលែងសម្លៀកបំពាក់ធ្វើពីរោមសត្វ មានទុនវិនិយោគ ៥៩៨លានដុល្លារ ស្មើនឹង ៥,៣១% និងផ្នែកផ្សេងៗចំនួន ៦,៧២ ប៊ីលានដុល្លារ ស្មើនឹងជិត ៦០%។

គួរជម្រាបថា ចំនួនម្ចាស់ក្រុមហ៊ុន សហគ្រាសដែលបានចុះបញ្ជី ៣៦,៦៧៧ក្រុមហ៊ុននេះ មានបុរសចំនួន ៦២% និងស្រ្តីចំនួន ៣៨%។ ជាមួយគ្នានេះ កាលពីថ្ងៃទី០២ មិថុនា អាជីវកម្មដែលទទួលបានជោគជ័យលើការចុះបញ្ជីតាមថ្នាលបច្ចេកវិទ្យាព័ត៌មានដំណាក់កាលទី១ មានត្រឹមតែ ៣៦,៥០៩ក្រុមហ៊ុន និងមានដើមទុនសរុបចំនួន ១៩,៣៥ប៊ីលានដុល្លារ៕