ភ្នំពេញ៖ ទុរេនស្រស់របស់កម្ពុជា បានបញ្ចប់នីតិវិធីសម្រាប់ការនាំចេញទៅប្រទេសចិន ហើយអាចនាំចេញទៅប្រទេសចិនបានហើយ។ នេះបើតាមការលើកឡើងរបស់ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំកម្ពុជា។

ឯកឧត្តម វ៉ាង វិនពីន បានឱ្យដឹង កាលពីថ្ងៃទី៨ ខែកក្កដា ឆ្នាំ២០២៥ ថា ថ្មីៗនេះ រដ្ឋបាលគយចិន បានធ្វើបច្ចុប្បន្នភាពបញ្ជីរាយនាមចម្ការ និងរោងចក្រវេចខ្ចប់សម្រាប់ការនាំចេញផ្លែឈើកម្ពុជា ទៅកាន់ប្រទេសចិន ដោយសាធារណជន អាចមើលតាមរយៈតំណភ្ជាប់ http://dzs.customs.gov.cn/.../399.../sg38/3974291/index.html។

ឯកឧត្តម វ៉ាង វិនពីន លើកឡើងថា ការសម្រេចបានការនាំចេញទុរេនខ្មែរទៅចិននេះ ជាកសិផលដែលមានគុណភាពខ្ពស់ដំបូងគេរបស់កម្ពុជា ដែលត្រូវបានអនុញ្ញាតនាំចេញទៅកាន់ប្រទេសចិនក្នុងឆ្នាំ ២០២៥ និងជាសមិទ្ធផលថ្មីមួយទៀតនៃកិច្ចសហប្រតិបត្តិការជាក់ស្តែងចិន-កម្ពុជាផងដែរ។ សូមជម្រាបថា បច្ចុប្បន្ននេះ កម្ពុជា មានផ្លែឈើចំនួន ៥ប្រភេទ ដែលអាចនាំចេញទៅកាន់ប្រទេសចិន ដូចជាចេក ស្វាយ មៀន ដូង និងធុរេន៕