ភ្នំពេញ៖ លោកស្រី Paetongtarn Shinawatra នាយករដ្ឋមន្រ្តីថៃ លើកឡើងថា វិធានការ ៦ចំណុច ដែលដាក់ចេញដោយ សម្ដេច ហ៊ុន សែន គឺបណ្តាលមកពីការយល់ច្រឡំរបស់កម្ពុជា ដែលទទួលបានព័ត៌មានថា ថៃនឹងកាត់ផ្តាច់អគ្គិសនី និងអ៊ីនធឺណិតនៅតាមតំបន់ព្រំដែន។

លោកស្រី Paetongtarn Shinawatra ពន្យល់ដូច្នេះថា៖ «ការត្រៀមលក្ខណៈក្នុងការកាត់ផ្តាច់អគ្គិសនី និងអ៊ីនធឺណិត គ្រាន់តែជាវិធានការត្រៀមបម្រុងទុក ដែលត្រូវតែឆ្លងកាត់ការយល់ព្រមពីក្រុមប្រឹក្សាសន្តិសុខជាតិ (NSC) ជាមុនសិន ហើយរដ្ឋាភិបាល មិនទាន់បានប្រកាសជាផ្លូវការនៅឡើយនោះទេ»។ នាយករដ្ឋមន្ត្រីថៃ ក៏បានឱ្យក្រសួងការបរទេសរបស់ខ្លួន សម្របសម្រួលដើម្បីពន្យល់ជាមួយភាគីកម្ពុជា លើបញ្ហានេះផងដែរ។

កម្ពុជា បានសម្រេចចិត្តធានាការផ្គត់ផ្គង់អគ្គិសនី និងអ៊ីនធឺណិតដោយខ្លួនឯង ដោយមិនចាំបាច់ពឹងផ្អែកការទិញពីប្រទេសថៃទៀតទេ។ គួរបញ្ជាក់ថា វិធានការ ៦ចំណុចរបស់ សម្ដេច ហ៊ុន សែន នោះរួមមានការប្រកាសផ្អាកការនាំចូលទំនិញថៃ, បង្កើនទីផ្សារដល់កសិករក្នុងស្រុក, បញ្ជូនអ្នកជំងឺ ដែលធ្លាប់ព្យាបាលនៅថៃទៅកាន់មន្ទីរពេទ្យប្រទេសផ្សេង, ឱ្យកម្លាំងប្រដាប់អាវុធត្រៀមខ្លួន ២៤ម៉ោង និងត្រៀមជម្លៀសប្រជាពលរដ្ឋនៅតំបន់ព្រំដែន។ វិធានការទាំងនេះ នឹងត្រូវអនុវត្តជាផ្លូវការក្នុងករណីភាគីថៃ មិនព្រមបើកច្រកព្រំដែន ដែលខ្លួនបិទជាឯកតោភាគី៕