ភ្នំពេញ៖ «ការបង្កើនផលិតភាពវិស័យសាធារណៈ» ដើរតួនាទីយ៉ាងសំខាន់ ក្នុងការជួយទ្រទ្រង់ដល់កំណើនសេដ្ឋកិច្ចជាតិ ដែលជាគោលដៅចម្បងរបស់រាជរដ្ឋាភិបាលកម្ពុជា ក្នុងការជំរុញបរិយាកាសធុរកិច្ច និងទាក់ទាញវិនិយោគិនជាតិ និងអន្តរជាតិឱ្យមកបណ្តាក់ទុននៅកម្ពុជា។ នេះគឺជាការលើកឡើងរបស់ ឯកឧត្តម ភោគ សុវណ្ណារិទ្ធ រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងពិធីបើកសន្និសីទ ស្តីពីការអភិវឌ្ឍអ្នកជំនាញផលិតភាពក្នុងវិស័យសាធារណៈ។

ក្នុងសន្និសីទខាងលើ ដែលរៀបចំឡើងរយៈពេល ៣ថ្ងៃ ចាប់ពីថ្ងៃទី៣ ដល់ថ្ងៃទី៥ ខែមេសា ឆ្នាំ២០២៥ ដែលជាសន្និសីទវគ្គទី៣ នៃកម្មវិធីសេវាអ្នកជំនាញបច្ចេកទេសនេះ គឺផ្តល់ជាវេទិកាសម្រាប់អ្នកជំនាញផលិតភាពក្នុងវិស័យសាធារណៈនៅកម្ពុជា ឱ្យបានសិក្សាស្វែងយល់ពីឧត្តមានុវត្តន៍ជាអន្តរជាតិ និងអនុវត្តយុទ្ធសាស្រ្តជោគជ័យដើម្បីធ្វើទំនើបកម្មស្ថាប័នរបស់ខ្លួន។ ការអភិវឌ្ឍអ្នកជំនាញផលិតភាពក្នុងវិស័យសាធារណៈ គឺមានសារសំខាន់សម្រាប់ការកែលម្អការផ្តល់សេវាសាធារណៈ និងបង្កើនទំនុកចិត្តសាធារណជន ព្រមទាំងធានាថា ធនធានត្រូវបានប្រើប្រាស់ប្រកបដោយប្រសិទ្ធភាពសម្រាប់ការអភិវឌ្ឍជាតិ។

សន្និសីទខាលើ ដែលមានការគាំទ្រដោយអង្គការផលិតភាពអាស៊ី (APO) ក៏មានកិច្ចពិភាក្សាផ្តោតលើបរិវត្តកម្មឌីជីថល កំណែទម្រង់ក្របខ័ណ្ឌគតិយុត្ត និងការកែលម្អដំណើរការការងារ ដើម្បីរួមចំណែកលើកកម្ពស់រដ្ឋបាលសាធារណៈនៅកម្ពុជា។ កម្មវិធីនេះ មានរួមបញ្ចូលការចុះទស្សនកិច្ចទៅកាន់ស្ថាប័នជាតិសំខាន់ៗ ដូចជាក្រុមប្រឹក្សាអភិវឌ្ឍន៍កម្ពុជា ក្រសួងមុខងារសាធារណៈ និងក្រសួងសាធារណការ និងដឹកជញ្ជូន ដែលអនុញ្ញាតិឱ្យសិក្ខាកាមវិភាគលើការអនុវត្តជាក់ស្តែង នៃយុទ្ធសាស្ត្រផលិតភាពរបស់ស្ថាប័នទាំងនោះផងដែរ៕