ភ្នំពេញ៖ គណៈប្រតិភូសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ពិចារណាវិនិយោគបង្កើតតំបន់កសិ-ឧស្សាហកម្ម ដើម្បីកែច្នៃកសិផល ដូចជាកៅស៊ូ ដើមកៅស៊ូជាដើម ដែលកំពុងមានសក្តានុពល និងដើម្បីផ្គត់ផ្គង់ដល់ឧស្សាហកម្មក្នុងស្រុក ដែលកំពុងមានតម្រូវការកើនឡើង។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា នាថ្ងៃទី៣ ខែមេសា ឆ្នាំ២០២៥។

ក្នុងជំនួបជាមួយ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា គណៈប្រតិភូសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា លោក Trương Minh Trung អគ្គនាយករងទី១ នៃក្រុមហ៊ុន Vietnam Rubber Group និងជាប្រធានគណៈកម្មាធិការអភិវឌ្ឍន៍កៅស៊ូ ១០ម៉ឺនហិកតា នៅកម្ពុជា បានចាប់អារម្មណ៍ពង្រីកការវិនិយោគក្នុងវិស័យផលិតថាមពលស្អាតនៅកម្ពុជា និងបានស្នើសុំការគាំទ្រពីក្រុមប្រឹក្សាអភិវឌ្ឍន៍កម្ពុជា។

ឯកឧត្តមអគ្គលេខាធិការ ឯកឧត្តម ជា វុទ្ធី បានលើកឡើងដោយសង្ខេបពីស្ថានភាពថ្មីៗ នៃបរិយាកាសវិនិយោគនៅកម្ពុជា ព្រមទាំងបានលើកឡើងពីវត្តមានរបស់ក្រុមហ៊ុនផលិតសំបកកង់យានយន្តនៅកម្ពុជា ដែលបានធ្វើឱ្យមានកំណើន នៃតម្រូវការជ័រកៅស៊ូក្នុងស្រុកផងដែរ។ ឯកឧត្តម ជា វុទ្ធី បានគាំទ្រដល់គម្រោងពង្រីកការវិនិយោគរបស់ក្រុមហ៊ុនក្នុងវិស័យផលិតថាមពលស្អាតនៅកម្ពុជា ក្នុងនោះក្រុមប្រឹក្សាអភិវឌ្ឍន៍កម្ពុជា នៅតែបន្តគាំទ្រ ថែទាំការវិនិយោគរបស់វៀតណាម ដែលកំពុងមានសកម្មភាពនៅកម្ពុជា និងរង់ចាំស្វាគមន៍ដោយក្តីរីករាយចំពោះការវិនិយោគបន្ថែមពីវៀតណាម៕