ភ្នំពេញ៖ កម្ពុជា និងចិន នឹងសហការគ្នាផ្សព្វផ្សាយពីសក្តានុពលទេសចរណ៍នៃប្រទេសកម្ពុជា នៅលើបណ្តាញសង្គមនៅប្រទេសចិន ដើម្បីបង្កើនភ្ញៀវទេសចរពីចិនមកកម្ពុជាឱ្យកាន់តែច្រើន។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី៦ ខែកញ្ញា ឆ្នាំ២០២៤។

បន្ថែមលើសហការផ្សព្វផ្សាយទេសចរណ៍របស់កម្ពុជា ភាគីទាំងពីរ ក៏បានប្តេជ្ញាជំរុញការតភ្ជាប់ជើងហោះហើររវាងប្រទេសទាំងពីរឱ្យបានកាន់តែច្រើន ដើម្បីជំរុញលំហូរភ្ញៀវទេសចរផងដែរ។ ការឯកភាពនេះ ធ្វើឡើងនាពេល ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ចូលរួមកិច្ចប្រជុំត្រីភាគី ជាមួយឯកឧត្តម Wang Wenbin ឯកអគ្គរដ្ឋទូតវិសាមញ្ញ និងពេញសមត្ថភាពប្រទេសចិន ប្រចាំកម្ពុជា និងលោកស្រី Zheng Lijuan ប្រធានទីភ្នាក់ងារទេសចរណ៍ ដែលធំបំផុតនៅចិន។

សូមជម្រាបថា កិច្ចប្រជុំត្រីភាគី ស្ដីពីកិច្ចសហប្រតិបត្តិការលើវិស័យទេសចរណ៍ រវាងក្រសួងទេសចរណ៍នៃកម្ពុជា ស្ថានទូតចិនប្រចាំកម្ពុជា និងក្រុមទេសចរណ៍នៃប្រទេសចិន ធ្វើឡើងកាលពីថ្ងៃទី០៦ ខែកញ្ញា ឆ្នាំ២០២៤៕