ភ្នំពេញ៖ សមាគមឧស្សាហកម្មឧបករណ៍អគ្គិសនី-អេឡិចត្រូនិកហុងកុង ចាប់អាម្មណ៍បណ្តាក់ទុនវិនិយោគក្នុងវិស័យឧបករណ៍អគ្គិសនីក្នុងប្រទេសកម្ពុជា។ នេះបើតាមការលើកឡើងរបស់ ប្រធានសមាគមលោក Ting Sik Wa Thomas ក្នុងជំនួបជាមួយ ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា កាលពីថ្ងៃទី២៦ ខែមីនា ឆ្នាំ២០២៥។

ក្នុងជំនួបជាមួយ ឯកឧត្តម នុត អ៊ុនវ័ណរ៉ា ព្រមទាំងតំណាងក្រុមហ៊ុនជាសមាជិកចំនួន ១០ផ្សេងទៀត តំណាងសមាគម បានលើកឡើងថា កម្ពុជាជាប្រទេសសក្តានុពលមួយក្នុងចំណោមបណ្តាប្រទេសនៅក្នុងតំបន់អាស៊ីអាគ្នេយ៍ ពិសេសសម្រាប់អ្នកវិនិយោគហុងកុង ដែលកំពុងសម្លឹងរកទីតាំងសមស្របមកបណ្តាក់ទុន។ បន្ថែមលើនេះ លោក Ting Sik Wa Thomas ក៏បានស្នើក្រុមប្រឹក្សាអភិវឌ្ឍន៍កម្ពុជា ឱ្យបន្តផ្តល់កិច្ចសហការជាមួយសមាគម ដើម្បីលើកកម្ពស់ការទាក់ទាញវិនិយោគហុងកុងក្នុងវិស័យអគ្គិសនី និងអេឡិចត្រូនិកមកកម្ពុជា។

ឯកឧត្តម នុត អ៊ុនវ័ណរ៉ា បានលើកឡើងពីស្ថានភាពបច្ចុប្បន្ន នៃការវិនិយោគក្នុងវិស័យឧបករណ៍អគ្គិសនី និងអេឡិចត្រូនិកនៅកម្ពុជា និងតួនាទីភារកិច្ច រចនាសម្ព័ន្ធរបស់ក្រុមប្រឹក្សាអភិវឌ្ឍន៍កម្ពុជា ព្រមទាំងស្នើដល់សមាគម ពិចារណាបណ្តាក់ទុនវិនិយោគនៅកម្ពុជា។ គួរបញ្ជាក់ថា សមាគមឧស្សាហកម្មឧបករណ៍អគ្គិសនី-អេឡិចត្រូនិកហុងកុង មានសមាជិកចំនួន ២០២ក្រុមហ៊ុន និងបង្កើតឡើងនៅឆ្នាំ១៩៩៨ ក្នុងនាមជាស្ថាប័នឯករាជមិនរកប្រាក់ចំណេញ ដើម្បីធ្វើជាក្រុមតំណាងឱ្យឧស្សាហកម្មឧបករណ៍អគ្គិសនីហុងកុង៕