ភ្នំពេញ៖ សៀមខិតខំបង្ហាញថា ខ្លួនជាជនរងគ្រោះព្រោះខែ្មរប្រើគ្រាប់មីន PMN-2ថ្មី ដាក់ក្នុងទឹកដីខ្លួន។ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ ចោទសួរទៅកាន់សៀមថា៖ «ខ្មែរ យកគ្រាប់មីនទៅដាក់ក្នុងទឹកដីសៀមរបៀបម៉េច? បើទឹកដីស្ថិតនៅទល់មុខគ្នានោះជាដីមានជម្លោះ»។

ឯកឧត្តម ហេង រតនា មានប្រសាសន៍ថា ថៃ កែឆ្នៃក្រឡៃសត្វដំរីមកជាសត្វស្រមោច រីឯសត្វស្រមោចឱ្យក្លាយជាសត្វដំរី ដោយលាបពណ៌កម្ពុជាថា យកគ្រាប់បែក MK-84 សំណល់សង្គ្រាមឆ្នាំ១៩៧០-១៩៧៣ មកដាក់តាំងបង្ហាញ ប៉ុន្តែជាក់ស្តែងគ្រាប់បែកMK-84 ស្ថិតនៅភូមិថ្មដូន ឃុំគោកមននេះ ផលិតឆ្នាំ១៩៩៦ ហើយគ្រាប់បែក MK-82 ទម្លាក់នៅវត្តតាមន្តសែនជ័យផលិតនៅឆ្នាំ២០២៣។ ឯកឧត្តម ហេង រតនា សួរទៅថៃថា តើគ្រាប់បែកផលិតនៅឆ្នាំ១៩៩៦ និង២០២៣ អាចជាសំណល់សង្គ្រាមឆ្នាំពី១៩៧០-១៩៧៣កើតដែរឬ?

ឯកឧត្តមអគ្គនាយកស៊ីម៉ាក់ លើកឡើងបន្តថា ទីតាំងគ្រាប់បែកដែលថៃយកមកទម្លាក់នៅកម្ពុជានេះ នៅសល់ ៥គ្រាប់ទៀត ដែលនៅកប់ដីនៅឡើយ ហើយមនុស្សនៅលើពិភពលោក អាចមកឃើញគ្រាប់បែកទាំងនេះបាន និងអាចចុះមកពិនិត្យបានដោយផ្ទាល់ នៅពេលមន្ត្រីជំនាញCMAC ដោះបន្សាបនាពេលខាងមុខ។

គួរបញ្ជាក់ថា ប្រាសាទព្រះវិហារ ត្រូវរងគ្រោះដោយសារគ្រាប់ផ្លោង ១៥៥មម គ្រាប់បែកចង្កោម និងគ្រាប់ជាច្រើនប្រភេទ ហើយនៅពេលឃើញរណ្តៅគ្រាប់ និងការបែកបាក់ប្រាសាទទាំងនោះ ពួកសៀមបែរជាចោទខ្មែរថា រណ្តៅគ្រាប់ទាំងនោះ ខែ្មររៀបចំជីករណ្តៅបង្ហាញដើម្បីលាបពណ៌បង្ខូចឈ្មោះថៃ ហើយថៃជាជនរងគ្រោះទៅវិញ។ នេះបើតាមការចុះផ្សាយនៅលើគេហទំព័ររបស់ ឯកឧត្តម ហេង រតនា នាថ្ងៃទី២០ ខែសីហា ឆ្នាំ២០២៥៕