ភ្នំពេញ៖ ឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន និងក្រសួងធនធានទឹក និងឧតុនិយម ពិភាក្សាលើការងារបច្ចេកទេសសម្រាប់គម្រោង«ព្រែកជីកហ្វូណនតេជោ» នាថ្ងៃទី៣១ ខែឧសភា ឆ្នាំ២០២៤នេះ ខណៈដែលសម្តេចធិបតីនាយករដ្ឋមន្ត្រី ហ៊ុន ម៉ាណែត ប្រកាសពីការបើកការដ្ឋានសាងសង់នៅក្នុងខែសីហាខាងមុខ។

ជំនួបពិភាក្សា ដែលដឹកនាំដោយឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក ដោយមានការចូលរួមពីមន្ត្រីជំនាញរបស់ក្រសួងទាំង២នាពេលនេះ គឺជា ភាពចាំបាច់នៃកិច្ចសហការរវាងក្រសួងទាំងពីរបន្ថែមលើការងារបច្ចេកទេស ក្នុងការអនុវត្តគម្រោង«ព្រែកជីកហ្វូណនតេជោ» ដើម្បីបម្រើផលប្រយោជន៍ដល់សង្គមជាតិទាំងមូល។

ការពិភាក្សាការងារបច្ចេកទេសនេះ ធ្វើឡើងក្រោយសម្តេចធិបតីនាយករដ្ឋមន្ត្រី ប្រកាសថ្ងៃបើកការដ្ឋានផ្លូវនៅក្នុងខែសីហាខាងមុខ ក្នុងឱកាសដែលសម្តេចថ្លែងសម្ពោធដាក់ឱ្យប្រើប្រាស់សមិទ្ធផលមួយចំនួននៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ស្ថិតនៅឧទ្យានជាតិព្រះសុរាម្រិត-កុសមៈ «គិរីរម្យ» នៅព្រឹកថ្ងៃទី៣០ ខែឧសភា ឆ្នាំ២០២៤។

«យើងនឹងបើកការដ្ឋាន(សាង់សង់ព្រែកជីកហ្វូណនតេជោ) នៅក្នុងខែសីហា ឆ្នាំ២០២៤ខាងមុខនេះ។ កុំឱ្យអ្នកខ្លះថាធ្វើមិនកើត! ឱ្យតែស្មារតីខ្មែររួមគ្នា ដាក់ចិត្តធ្វើ ខ្មែរធ្វើបាន!»។ សម្តេចនាយករដ្ឋមន្ត្រីបានគូសបញ្ជាក់យ៉ាងដូច្នេះ ដោយបានបញ្ជាក់បន្ថែមថា ទោះមិនមានការចូលរួមពីវិនិយោគិនក្រៅប្រទេសក៏ដោយ ក៏កម្ពុជា នៅតែអាចធ្វើបានព្រោះធ្វើនៅលើទឹកដីខ្មែរ ដើម្បីផលប្រយោជន៍ដល់ជាតិនិងប្រជាជនកម្ពុជាយើង។

សូមជម្រាបថា គម្រោង«ព្រែកជីកហ្វូណនតេជោ» ដែលតភ្ជាប់ផ្លូវទឹករវាងទន្លេ ទៅកាន់សមុទ្ររបស់កម្ពុជា នាពេលនេះ នឹងពង្រីកវិសាលភាពនៃការប្រើប្រាស់សក្តានុពលដឹកជញ្ជូនតាមផ្លូវទឹករបស់ប្រទេសកម្ពុជា សំដៅចូលរួមលើកកម្ពស់សកម្មភាពសេដ្ឋកិច្ច-សង្គម ឱ្យកាន់តែមានការរីកចម្រើនឈានទៅមុខមួយកម្រិតថែមទៀត។

តាមការសិក្សាបង្ហាញថា ផ្លូវទឹកព្រែកជីកហ្វូណន-តេជោ មានប្រវែង ១៨០ គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន ៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាពលរដ្ឋសរុបប្រមាណ ១.៦លាននាក់ រស់នៅអមសងខាងផ្លូវទឹក។ ការសាងសង់គម្រោងផ្លូវទឹកពីទន្លេឆ្ពោះទៅសមុទ្ររបស់កម្ពុជា នេះ ត្រូវបានប៉ាន់ស្មានថា នឹងចំណាយទុនវិនិយោគ ១,៧០០លានដុល្លារអាម៉េរិក និងប្រើរយៈពេលសាងសង់ប្រមាណ ៤ឆ្នាំ៕