ភ្នំពេញ៖ មូលនិធិគន្ធបុប្ផាកម្ពុជា បានទទួលថវិកាជាង៤លានដុល្លារ (៤,០០១,២៥០ដុល្លារ) ពីព្រឹត្តិការណ៍បាល់ទាត់មិត្តភាពសប្បុរសធម៌ ក្រោមមូលបទ៖«រួមគ្នាដើម្បីសប្បុរសធម៌ និងប្រយុទ្ធប្រឆាំងគ្រឿងញៀន» កាលពីថ្ងៃទី០១ ឧសភា ឆ្នាំ២០២៤នេះ ដែលផ្តួចផ្តើមដោយសម្ដេចតេជោ ហ៊ុន សែន ប្រធានព្រឹទ្ធសភា និងជាស្ថាបនិកមូលនិធិគន្ធបុប្ផាកម្ពុជា។

សម្តេចតេជោ ហ៊ុន សែន បានប្រកាសពីចំនួនថវិកាដែលទទួលបានពីសប្បុរជនបរិច្ឆាកសរុបចំនួនជាង៥លានដុល្លារ (៥,០០១,២៥០ដុល្លារ) តាមរយៈសម្តេចផ្ទាល់ ក្រោយបញ្ចប់ព្រឹត្តិការណ៍បាល់ទាត់សប្បុរសធម៌នេះ។ សម្តេចតេជោ ហ៊ុន សែន ក៏បានប្រកាសផងដែរថា ក្រៅពីការផ្តល់ឱ្យមូលនិធិគន្ធបុប្ផាកម្ពុជា សម្តេចតេជោ ហ៊ុន សែន បានផ្តល់ទៅមន្ទីរពេទ្យកុមារអង្គរ ៥០ម៉ឺនដុល្លារ, មជ្ឈមណ្ឌលព្យាបាលកុមារបេះដូងជប៉ុន ៣០ម៉ឺនដុល្លារ និងផ្តល់ទៅគ្រួសារយុទ្ធជនពលីទាំង២០នាក់ ក្នុងឧបទ្ទវហេតុផ្ទុះឃ្លាំងយុទ្ធោបករណ៍ នៅខេត្តកំពង់ស្ពឺកាលពីថ្ងៃទី២៧ មេសាកន្លងទៅ ចំនួន២០ម៉ឺនដុល្លារផងដែរ ដោយមួយគ្រួសារទទួលបាន១ម៉ឺនដុល្លារ។

ក្រៅពីទទួលបានថវិកាជាង៤លានដុល្លារពីព្រឹត្តិការណ៍បាល់ទាត់សប្បុរសធម៌ ដែលសម្តេចតេជោ ហ៊ុន សែន ដឹកនាំនេះ មូលនិធិគន្ធបុប្ផាកម្ពុជា ក៏បានទទួលថវិកាមួយចំនួនទៀតពីសប្បុរជនដែលបានបរិច្ឆាកដល់មូលនិធិនេះផ្ទាល់ផងដែរ៕