ភ្នំពេញ៖ ជានិស្សិតបរិញ្ញាបត្រផ្នែកច្បាប់ យុវតី បុប្ផា ដែលជាជនជាតិដើមភាគតិចចារាយ ត្រូវបានឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានផ្តល់ឱកាសឱ្យធ្វើជារដ្ឋមន្ត្រី ដើម្បីសិក្សាស្វែងយល់អំពីតួនាទីរបស់រដ្ឋមន្រ្តីក្រសួងបរិស្ថានក្នុងរយៈពេល១ថ្ងៃ។

ក្រសួងបរិស្ថាន បានឱ្យដឹងថ្ងៃទី០៦ ខែឧសភា ឆ្នាំ២០២៤ ថា ការផ្តល់ឱកាសនេះដើម្បីបង្កភាពងាយស្រួលដល់យុវជនកម្ពុជា ក្នុងការស្វែងយល់អំពីតួនាទីការងារ និងជាផ្នែកមួយនៃការបណ្តុះគំនិតស្មារតីក្នុងភាពជាអ្នកដឹកនាំនាពេលអនាគត ជាពិសេសកុមារី ក្មេងស្រី ដែលងាយរងគ្រោះមកពីតំបន់ដាច់ស្រយាល និងក្រីក្រ ដើម្បីជួយបណ្តុះស្មារតី និងភាពអង់អាចរបស់ពួកគេ។

ឯកឧត្តមបណ្ឌិត អ៊ាង សុផល្លែត បានអនុញ្ញាតឱ្យមានការសិក្សាស្វែងយល់ និងចង់ឱ្យមានការរួមចំណែកជាគំនិតយោបល់ និងជាយុទ្ធសាស្រ្តនានា ពីក្មេងស្រីជនជាតិដើមភាគតិចចារាយ ដើម្បីឱ្យពួកគេបានរួមចំណែកក្នុងវិស័យបរិស្ថានកម្ពុជា និងសិក្សាបន្ថែមអំពីយុទ្ធសាស្រ្តចក្រាវិស័យបរិស្ថាន ក៏ដូចជាយុទ្ធសាស្រ្តរបស់រាជរដ្ឋាភិបាលកម្ពុជានីតិកាលទី៧ នៃរដ្ឋសភាផងដែរ៕