ភ្នំពេញ៖ ក្រុមការងារបច្ចេកទេសនៃក្រសួងកសិកម្ម រុក្ខាប្រមាញ់ និងនេសាទ នឹងសហការជាមួយក្រុមហ៊ុនសូឡាហ្រ្គី អេនើជី (ខេមបូឌា) ខូអិលធីឌី ជួយគាំទ្រដល់កសិករ ពិសេសសហគមន៍កសិកម្មទំនើប ឱ្យទទួលបាននូវបច្ចេកទេសប្រើប្រាស់សម្ភារ និងសេវាកម្មថាមពលសូឡា ដើម្បីភាពចំណេញ និងអត្ថប្រយោជន៍ជាច្រើនក្នុងវិស័យកសិកម្ម។ នេះជាប្រសាសន៍របស់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម។

ឯកឧត្តម ឌិត ទីណា ណែនាំឱ្យក្រុមហ៊ុនពិនិត្យលទ្ធភាពឱ្យកសិករអាចប្រើប្រាស់សេវាកម្ម ដោយចំណាយតិច ថ្លៃដើមផលិតទាប ទទួលបានផលចំណេញច្រើន និងមានប្រសិទ្ធភាពសេដ្ឋកិច្ចពិតប្រាកដ។ ឯកឧត្តម ឌិត ទីណា លើកឡើងដូច្នេះបន្ទាប់ពីស្តាប់បទបង្ហាញរបស់ក្រុមហ៊ុនសូឡាហ្រ្គី អេនើជី ស្តីពីស្ថានីយបូមទឹកដើរដោយពន្លឺព្រះអាទិត្យ និងម៉ូឌែលធុរកិច្ចនៃសេវាកម្មផ្គត់ផ្គង់ទឹកសម្រាប់ស្រូវប្រាំង កាលពីថ្ងៃទី២ ខែកញ្ញា ឆ្នាំ២០២៤។

គួរបញ្ជាក់ថា ក្រុមហ៊ុន សូឡា ហ្រ្គីន អេនើជី (ខេមបូឌា) ខូអិលធីឌី ជាក្រុមហ៊ុនផ្តោតលើការផលិតគ្រឿងចក្រមានគុណភាពខ្ពស់ ផ្តល់ការគាំទ្រផ្នែកបច្ចេកទេស សេវាកម្មថែទាំ និងច្នៃប្រឌិតថ្មីនៃបច្ចេកវិទ្យាថាមពលកកើតឡើងវិញ៕