ភ្នំពេញ៖ ក្រុមហ៊ុន Otis McAllister, Inc ដែលជាក្រុមហ៊ុនបញ្ជាទិញអង្ករ និងគ្រាប់ធញ្ញជាតិរបស់អាម៉េរិក កំពុងពិនិត្យលទ្ធភាពក្នុងការបញ្ជាទិញអង្ករកម្ពុជា ដើម្បីយកទៅចែកចាយនៅក្នុងទីផ្សាររបស់អាម៉េរិក។ នេះបើតាមការលើកឡើងរបស់លោក Patrick Murphy អនុប្រធានប្រតិបត្តិទទួលបន្ទុកផ្នែកបញ្ជាទិញអង្ករ និងគ្រាប់ធញ្ញជាតិ នៃក្រុមហ៊ុន Otis McAllister, Inc។

ក្នុងជំនួបពិភាក្សាជាមួយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម លោក Patrick Murphy បានបន្តថា ភាពរីកចម្រើនជារួមរបស់កម្ពុជា គឺខុសប្លែកពីអ្វីដែលលោកធ្លាប់បានទទួលព័ត៌មាននៅខាងក្រៅ ពិសេសទៅលើកសិកម្មកម្ពុជា ដែលមានផលិតផលអង្ករប្រកបដោយគុណភាព និងបរិមាណដែលទទួលយកបាន។

តាមការចុះផ្សាយរបស់ក្រសួងពាណិជ្ជកម្ម នាថ្ងៃទី៣ ខែមិថុនា ឆ្នាំ២០២៤ លោកជំទាវ ចម និម្មល បានលើកទឹកចិត្តឱ្យក្រុមហ៊ុននាំចេញអង្ករធំៗចំនួន១៦ ដែលជាសមាជិករបស់សហព័ន្ធធ្វើការដោយផ្ទាល់ជាមួយក្រុមហ៊ុន Otis McAllister ដើម្បីចុះកិច្ចព្រមព្រៀងបញ្ជាទិញអង្ករកម្ពុជាចូលទៅទីផ្សារសហរដ្ឋអាម៉េរិកក្នុងពេលឆាប់ៗខាងមុខ៕