ភ្នំពេញ៖ ក្រុមហ៊ុន អេមរុ រាយស៍ (កម្ពុជា) (Amru Rice Cambodia) និងសហគមន៍កសិកម្មទំនើប សហគមន៍កសិកម្ម និងសហភាពសហគមន៍កសិកម្មនៅខេត្តបាត់ដំបង បានចុះកិច្ចសន្យាផលិតកម្មកសិកម្មចំនួន៦ ដែលទំហំជិត ១០លានដុល្លារ។  

ការចុះកិច្ចសន្យាកាលពីថ្ងៃទី៩ ខែមិថុនា ឆ្នាំ២០២៦ នេះ គឺជាជំហានថ្មីមួយទៀត ក្រោមការគាំទ្រនិងសម្របសម្រួលយ៉ាងជិតស្និទ្ធពីក្រសួងកសិកម្ម រុក្ខាប្រមាញ់ និងនេសាទ ដល់សហគមន៍កសិកម្មទំនើប សហគមន៍កសិកម្ម និងសហភាពសហគមន៍កសិកម្ម ដែលបានចុះកិច្ចសន្យារួមគ្នា ដើម្បីធានាស្ថិរភាពទីផ្សារជូនដល់កសិករជាសមាជិក ពិសេសក្នុងបរិបទដែលមានភាពមិនច្បាស់លាស់ និងហានិភ័យនៃការប្រែប្រួលតម្លៃស្រូវនៅលើទីផ្សារ។

កិច្ចសន្យាផលិត និងផ្គត់ផ្គង់ស្រូវពូជ និងស្រូវចំណីស្តង់ដាសុវត្ថិភាព (SRP)ទាំង៦ នេះ រួមមាន ៤កិច្ចសន្យាសម្រាប់ស្រូវចំណី និង ២ កិច្ចសន្យាសម្រាប់ស្រូវពូជ ដែលជាកិច្ចសន្យាមានសុពលភាពរយៈពេលពេញមួយឆ្នាំ ឬពីររដូវកាលដាំដុះ។ ជាមួយគ្នានេះ ក្រសួងកសិកម្ម រុក្ខាប្រមាញ់ និងនេសាទ បានអបអរសាទរចំពោះកសិករជាសមាជិកសហគមន៍ទាំងអស់ និងបានកោតសរសើរដល់ដៃគូវិស័យឯកជន ដែលបានចូលរួមសហការគាំទ្រ និងជួយពង្រឹងខ្សែច្រវាក់តម្លៃកសិកម្មកម្ពុជាឱ្យកាន់តែមានភាពរឹងមាំ និងប្រកបដោយនិរន្តរភាព៕