ភ្នំពេញ៖ យុវជន គួរតែចាប់ផ្តើមវិនិយោគនៅវ័យក្មេង ព្រោះជាវ័យមួយដែលពួកគេមិនទាន់មានបន្ទុកហិរញ្ញវត្ថុត្រូវរ៉ាប់រង និងមានពេលវេលាគ្រប់គ្រាន់សិក្សាស្វែងយល់ពីឱកាស ជម្រើសនៃការវិនិយោគ និងមានពេលវេលាកែតម្រូវយុទ្ធសាស្ត្រក្នុងការវិនិយោគ ដោយរៀនពីភាពជោគជ័យ និងបរាជ័យ។

ព្រឹត្តិបត្រប៉ុស្តិ៍មូលបត្រស្តីពី«ចំណេះដឹងមូលដ្ឋាន» របស់និយ័តករមូលបត្រកម្ពុជា លេខ១០ ដែលចេញផ្សាយថ្ងៃទី៣១ ខែតុលា ឆ្នាំ២០២៤ និយាយពីមគ្គុទ្ទេសក៍សម្រាប់យុវវ័យក្នុងការចាប់ផ្តើមវិនិយោគក្នុងទីផ្សារភាគហ៊ុននៅកម្ពុជា បានឱ្យដឹងថា យុវជនអាយុចាប់ពី១៥ឆ្នាំឡើងទៅ ដែលមានអត្តសញ្ញាណបណ្ណ (ជនជាតិខ្មែរ) ឬលិខិតឆ្លងដែន(ជនបរទេស) អាចស្នើសុំលេខអត្តសញ្ញាណវិនិយោគិន ដើម្បីបើកគណនីជួញដូរបាន។ ដូច្នេះ ប្រសិនបើយុវជនចាប់ផ្តើមវិនិយោគនៅអាយុ ១៥ឆ្នាំ នោះនឹងមានទឹកប្រាក់ចំនួនជិត១,៤លានដុល្លា (១,៣៩៦,៦៩០.២៣ដុល្លារ) ឬជិតស្មើនឹងចំនួននេះពីរដង ដែលនេះ គឺជាឥទ្ធិពលនៃការប្រាក់សមាស។

ក្នុងព្រឹត្តិបត្រដដែក បានលើកជាឧទាហរណ៍ថា ប្រសិនបើយុវជន ចាប់ផ្តើមវិនិយោគនៅអាយុ ២២ឆ្នាំ ក្នុងទឹកប្រាក់ ១០០ដុល្លារក្នុងមួយខែ នឹងទទួលបានប្រាក់ចំណេញ ១០% ក្នុងមួយឆ្នាំ ពោលគឺពួកគេនឹង មានទឹកប្រាក់ចំនួនជាង៧១ម៉ឺនដុល្លារ (៧១០,៨១០.៨៣ដុល្លារ) នៅពេលវិនិយោគឈានដល់អាយុ ៦៥ឆ្នាំ៕