ភ្នំពេញ៖ រយៈពេល ១០ខែ ឆ្នាំ២០២៤ កំពង់ផែស្វយ័តភ្នំពេញ (PPAP) រកចំណូលបាន ៣៤ ៤៧២ ៨៩៥ដុល្លារ ដែលមានការកើនឡើងចំនួន ១៨% បើធៀបនឹងរយៈពេល ១០ខែដើមឆ្នាំ២០២៣។ បើតាមសេចក្តីប្រកាសព័ត៌មានរបស់ PPAP ចេញផ្សាយនាថ្ងៃទី១៣ ខែវិច្ឆិកា ឆ្នាំ២០២៤ ចំណូលក្នុងរយៈពេល ១០ខែនេះ គឺមិនទាន់ធ្វើសវនកម្មទេ។

កំពង់ផែស្វយ័តភ្នំពេញ បានបញ្ជាក់ថា សម្រាប់ខែតុលា ឆ្នាំ២០២៤ រកចំណូលបានចំនួន ៣ ០១៥ ៦៨៩ ដុល្លារ ដែលមានការកើន ១០% បើធៀបនឹងរយៈពេលដូចគ្នាក្នុងខែតុលា ឆ្នាំ២០២៣។ ចំពោះ ខែតុលា នៃឆ្នាំ២០២៤នេះ បរិមាណកុងតឺន័រ ដែលបានឆ្លងកាត់កំពង់ផែមានចំនួន ៣៥ ២៦៤ទូ ដែលចំនួននេះកើនឡើងបាន ១៧,៧៥% បើធៀបនឹងខែតុលា ឆ្នាំ២០២៣។

ជាមួយគ្នានេះ រយៈពេល ១០ខែ ក្នុងឆ្នាំ២០២៤ បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញមានចំនួន ៤០១ ២៥១ ទូ (TEUs) ដោយមានការកើនឡើងចំនួន ១៩,៧៨% បើធៀបនឹងរយៈពេល ១០ខែ នៅក្នុងឆ្នាំ២០២៣៕