ភ្នំពេញ៖ ក្រុមហ៊ុន Smart Eden ដែលជាក្រុមហ៊ុនចែកចាយផលិតផលដ៏ធំរបស់ប្រទេសបារាំង បង្ហាញបំណងពង្រីកការនាំចេញផលិតផលកម្ពុជាពី ១០-១៥មុខ រួមមាន៖ អង្ករ ម្រេច ស្ករត្នោត ធ្យូងអនាម័យ និងគ្រោងផលិតបឺរពីគ្រាប់ស្វាយចន្ទី ដើម្បីនាំចេញទៅបារាំងក្នុងឆ្នាំ២០២៥ នេះ។ បើតាមការបញ្ជាក់របស់លោក Laurent Strauch នាយកប្រតិបត្តិក្រុមហ៊ុន Smart Eden កាលពីថ្ងៃទី០១ ខែមេសា ឆ្នាំ២០២៥។

ក្នុងជំនួបជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍លោក Laurent Strauch បានបញ្ជាក់ថា ក្រុមហ៊ុន Smart Eden ដែលមានបណ្តាញលក់ជាង ៦ពាន់ទីតាំងបារាំងនេះ ក៏បាននាំចេញគ្រាប់ស្វាយចន្ទី និងដំណាប់ស្វាយពីកម្ពុជានៅឆ្នាំ២០២៤ ដែលទទួលបានការគាំទ្រច្រើនពីអតិថិជនក្នុងប្រទេសបារាំង។ ទន្ទឹមនឹងនេះ លោក Strauch ក៏បានបង្ហាញពីចំណាប់អារម្មណ៍ក្នុងការយកកម្ពុជា ធ្វើជាទីតាំងយុទ្ធសាស្ត្រសម្រាប់តំបន់ ដើម្បីចែកចាយផលិតផលបារាំងដែលមានគុណភាពផងដែរ។

ជាមួយគ្នានេះ ឯកឧត្តម ហែម វណ្ណឌី បាបង្ហាញការគាំទ្រចំពោះក្រុមហ៊ុនក្នុងការផលិតបឺរពីគ្រាប់ស្វាយចន្ទី និងបានលើកទឹកចិត្តឱ្យក្រុមហ៊ុន សិក្សាផលិតផលសក្តានុពលផ្សេងៗទៀតរបស់កម្ពុជា ដោយសហការជាមួយក្រុមការងាររបស់ក្រសួងឧស្សាហកម្ម និងដៃគូដូចជាសហគ្រិនខ្មែរជាដើម។ បន្ថែមលើនេះ ឯកឧត្តម ហែម វណ្ណឌី ក៏បានលើកឡើងបន្តថា រាជរដ្ឋាភិបាលកម្ពុជា ផ្តល់អាទិភាពខ្ពស់ដល់ការអភិវឌ្ឍវិស័យស្វាយចន្ទី ជាទំនិញយុទ្ធសាស្ត្រ ដោយចង់ប្រែក្លាយកម្ពុជាទៅជាប្រទេសផ្គត់ផ្គង់ផលិតផលស្វាយចន្ទីធំបំផុតមួយសម្រាប់ពិភពលោក៕