ភ្នំពេញ៖ ក្រុមប្រឹក្សានាយកប្រតិបត្តិរបស់ធនាគារពិភពលោក បានអនុម័តហិរញ្ញប្បទានបន្ថែមទៀតចំនួន ៧៩,៥លានដុល្លារ ដើម្បីពង្រីកសកម្មភាពដែលបានអនុវត្តក្នុងគោលដៅលើកកម្ពស់លទ្ធភាពទទួលបានការអប់រំប្រកបដោយគុណភាពនៅកម្ពុជា។ នេះបើតាមសេចក្តីប្រកាសព័ត៌មានរបស់ធនាគារពិភពលោក នាថ្ងៃទី៣១ ខែឧសភា ឆ្នាំ២០២៤។

ក្នុងសេចក្តីប្រកាសព័ត៌មាននេះ លោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំនៅកម្ពុជា បានលើកឡើងថា ការផ្តល់ហិរញ្ញប្បទាននេះ ដើម្បីពង្រឹងបន្ថែមទៀតនូវកិច្ចប្រឹងប្រែងដោះស្រាយភាពក្រីក្រក្នុងការសិក្សា និងការកសាងមូលធនមនុស្សដែលចាំបាច់សម្រាប់សេដ្ឋកិច្ច និងការអភិវឌ្ឍរបស់កម្ពុជា។ លោកស្រីម៉ារីយ៉ាម សាលីម បានបន្តថា កម្ពុជា បានប្រឹងប្រែងយ៉ាងខ្លាំងក្នុងការពង្រីកលទ្ធភាពទទួលបានការអប់រំក្នុងរយៈពេលពីរទសវត្សរ៍ចុងក្រោយ ប៉ុន្តែលទ្ធផលនៃការសិក្សារបស់សិស្សនៅមានកម្រិតទាប និងលទ្ធភាពទទួលបានការអប់រំប្រកបដោយគុណភាពក៏នៅខ្វះសមធម៌ផងដែរ។

«កញ្ចប់ហិរញ្ញប្បទានបន្ថែមចំនួន ៧៩,៥លានដុល្លារនេះ នឹងពង្រីកសកម្មភាពគម្រោងទៅកាន់គ្រឹះស្ថានអប់រំផ្សេងទៀតនៅទូទាំងប្រទេស ដែលក្នុងនោះមានអនុវិទ្យាល័យចំនួន៥០០, សាលាបឋមសិក្សាចំនួន ១០០០ និងសាលាមត្តេយ្យចំនួន៩០»។ នេះជាការបញ្ជាក់បន្ថែមរបស់ប្រធានគ្រប់គ្រងធនាគារពិភពលោកប្រចាំនៅកម្ពុជា។

លោកស្រី Laura Frigenti នាយកប្រតិបត្តិនៃអង្គការភាពជាដៃគូសកលសម្រាប់ការអប់រំ បានលើកឡើងបន្ថែមថា មូលនិធិបន្ថែមខាងលើនេះ នឹងផ្តល់ឱកាសសម្រាប់បង្កើនកិច្ចខិតខំប្រឹងប្រែងពង្រឹងប្រព័ន្ធអប់រំ និងពន្លឿនការងើបឡើងវិញនៃការសិក្សា បន្ទាប់ពីមានការប៉ះពាល់បង្កដោយការរាតត្បាតជំងឺកូវីដ-១៩។ គួររំលឹកថា កាលពីខែមករា ឆ្នាំ២០២២ ធនាគារពិភពលោក បានអនុម័តកញ្ចប់ហិរញ្ញប្បទានលើកដំបូងចំនួន៦៩,២៥លានដុល្លារ ដើម្បីពង្រីកគម្រោងកែលម្អការអប់រំទូទៅនៅកម្ពុជា ដែលក្នុងនោះឥណទានចំនួន ៦០លានដុល្លារ បានមកពីសមាគមអភិវឌ្ឍន៍អន្តរជាតិ ដែលជាមូលនិធិរបស់ធនាគារពិភពលោកសម្រាប់ជួយជនខ្វះខាតបំផុត និង ១៩,៥លានដុល្លារ ពីអង្គការភាពជាដៃគូសកលសម្រាប់ការអប់រំ៕