ភ្នំពេញ៖ ឯកឧត្តមឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា ចុះអនុស្សរណៈយោគយល់គ្នា (MOU) ជាមួយលោក សុខ សុភមង្គល ស្ថានិក និងជានាយកប្រតិបត្តិក្រុមហ៊ុន កូដីងហ្គេត ថេកណូឡូជី ដើម្បីលើកកម្ពស់ការយល់ដឹងផ្នែកបច្ចេកវិទ្យាបញ្ញាសិប្បនិម្មិត (AI) ដល់សហគ្រាសធុនតូច និងមធ្យម (SMEs) ដែលជាសមាជិករបស់សភាពាណិជ្ជកម្ម នៅកម្ពុជា។

អនុស្សរណៈយោគយល់គ្នា ស្តីពី «កិច្ចសហប្រតិបត្តិការក្នុងការរៀបចំកម្មវិធីបណ្ដុះបណ្ដាលជំនាញឌីជីថល ជូនដល់ SMEs» មានបំណងផ្តល់ចំណេះដឹង និងលើកកម្ពស់ការយល់ដឹងពីការធ្វើអាជីវកម្មដោយប្រើប្រាស់បច្ចេកវិទ្យាថ្មីៗ ជាពិសេសប្រព័ន្ធបញ្ញាសិប្បនិម្មិត (AI) ជូនដល់សហគ្រាសធុនតូច និងមធ្យម ដែលជាសមាជិក សមាជិកា សភាពាណិជ្ជកម្មកម្ពុជា តាមរយៈវគ្គបណ្តុះបណ្តាលនានា។

កិច្ចសហការខាងលើនេះ នឹងលើកកម្ពស់ការប្រកួតប្រជែងសម្រាប់អាជីវកម្ម និងការអនុវត្តបច្ចេកវិទ្យាឌីជីថលថ្មីៗ ដល់អាជីវកម្មដែលជាសមាជិក សមាជិកា របស់សភាពាណិជ្ជកម្មកម្ពុជា ដែលជាចលករសំខាន់ក្នុងការជំរុញកំណើនសេដ្ឋកិច្ចកម្ពុជា តាមរយៈការប្រើប្រាស់ជំនាញឌីជីថលលើការដឹកនាំ និងប្រតិបត្តិការអាជីវកម្មរបស់ពួកគាត់ផងដែរ៕