ភ្នំពេញ៖ ប្រទេសអូម៉ង់ មានឆន្ទៈស្វែងរកដៃគូក្នុងប្រទេសកម្ពុជា ដើម្បីវិនិយោគបន្ថែមលើវិស័យកសិកម្ម ការកែច្នៃម្ហូបអាហារ និងវិស័យថាមពលបៃតង ដើម្បីសន្តិសុខស្បៀងនិងថាមពល។ នេះជាការលើកឡើងរបស់ លោក Nguyen Xuan Giao នាយកប្រតិបត្តិ ភ្នាក់ងារវិនិយោគអូម៉ង់-វៀតណាម (Vietnam-Oman Investment) កាលពីថ្ងៃទី១៨ ខែមីនា ឆ្នាំ២០២៥។

ឯកឧត្តមបណ្ឌិត សរ សិនិរ៉ា អគ្គលេខាធិការរង គណៈកម្មាធិការវិនិយោគកម្ពុជា លើកឡើងពីភាពបើកចំហរនៃរបបវិនិយោគនៅកម្ពុជា ដោយវិនិយោគិនបរទេសក៏អាចវិនិយោគ១០០% ក្នុងវិស័យជាច្រើន ដូចជាកសិកម្ម កម្មន្តសាល ទេសចរណ៍ និងការអភិវឌ្ឍហេដ្ឋារចនាសម្ព័ន្ធរូបវន្ត ជាមួយការលើកទឹកចិត្ត ដូចវិនិយោគិនកម្ពុជា ផងដែរ។ ក្នុងជំនួប ដែលមានការចូលរួមពី លោក Harith Al khadhoori ភ្នាក់ងារទំនាក់ទំនងទីផ្សារសកល នៃអាជ្ញាធរវិនិយោគអូម៉ង់ (Oman Investment Authority) ឯកឧត្តមអគ្គលេខាធិការរង សរ សិនិរ៉ា ក៏បានបញ្ជាក់ពីកត្តាសំខាន់ៗមួយចំនួនទៀត ដែលជាភាពទាក់ទាញរបស់កម្ពុជា ចំពោះការវិនិយោគផ្ទាល់ពីបរទេស ខណៈស្ថានភាពនៅតំបន់មជ្ឈឹមបូព៌ាកំពុងស្ថិតក្នុងវិបត្តិនៃសង្គ្រាម។

សូមជម្រាបថា ជាងមួយទសវត្សមកនេះ អាជ្ញាធរវិនិយោគអូម៉ង់ បាននិងកំពុងវិនិយោគលើគម្រោងមួយចំនួនក្នុងតំបន់ក្នុងវិស័យហេដ្ឋារចនាសម្ព័ន្ធរូបវន្ត និងភស្តុភារកម្ម អចលនទ្រព្យ ទឹកស្អាត បច្ចេកវិទ្យា និង សេវាកម្មលក់រាយជាដើម ដោយទុនវិនិយោគទាំងនេះ គឺជាទុនបម្រុងពីការលក់ប្រេងរបស់រដ្ឋាភិបាលអូម៉ង់ផ្ទាល់តែម្តង៕