ភ្នំពេញ៖ ក្រុមហ៊ុន Panasonic បានចុះអនុស្សរណៈយោគយល់គ្នា(MOU) ជាមួយវិទ្យាស្ថានបច្ចេកវិទ្យាកម្ពុជា(ITC) សម្ពោធជាផ្លូវការនូវមជ្ឈមណ្ឌលបណ្តុះបណ្តាលបច្ចេកទេសម៉ាស៊ីនត្រជាក់ប៉ាណាសូនិក ដើម្បីបណ្តុះបណ្តាលចំណេះ និងជំនាញបច្ចេកទេសដល់និស្សិតដែលកំពុងសិក្សានៅវិទ្យាស្ថានបច្ចេកទេសកម្ពុជា។

តាមការចុះផ្សាយរបស់ក្រសួងអប់រំ យុវជន និងកីឡា កាលពីថ្ងៃទី១៨ ខែមីនា ឆ្នាំ២០២៥ ការចុះ MOUនេះ ក្រុមហ៊ុន Panasonic នឹងផ្តល់ឧបករណ៍ម៉ាស៊ីនត្រជាក់ចុងក្រោយ, ផ្តល់ការបណ្តុះបណ្តាល អាហារូបករណ៍ កម្មសិក្សា និងធនធានសំខាន់ៗផ្សេងទៀតផងដែរ។ ជាមួយគ្នានេះ មជ្ឈមណ្ឌលបណ្តុះបណ្តាលបច្ចេកទេសម៉ាស៊ីនត្រជាក់ថ្មី នឹងផ្តល់ការបណ្តុះបណ្តាលតាមរយៈការអនុវត្តផ្ទាល់ជាក់ស្តែង ការអភិវឌ្ឍជំនាញ ដើម្បីធានាបានថានិស្សិតអាចទទួលបានបទពិសោធអប់រំដ៏ទូលំទូលាយស្របតាមស្តង់ដា។

ក្នុងកម្មវិធីនេះ ឯកឧត្តម Atsushi UENO ឯកអគ្គរាជទូតជប៉ុនប្រចាំកម្ពុជា បានសង្ឃឹមថា និស្សិតបញ្ចប់ការសិក្សាផ្នែកវិស្វកម្មដែលត្រូវបានគាំទ្ររួមគ្នាដោយវិស័យសាធារណៈ និងឯកជនរបស់ប្រទេសជប៉ុន នឹងដើរតួយ៉ាងសកម្មនៅក្នុងក្រុមហ៊ុនជប៉ុនជាច្រើននាពេលអនាគត។ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា កិច្ចសហការរវាងក្រុមហ៊ុន Panasonic និងវិទ្យាស្ថានបច្ចេកវិទ្យាកម្ពុជា គឺជាគំរូដ៏ល្អសម្រាប់ភាពជាដៃគូរវាងវិស័យសាធារណៈ និងឯកជនដែលអាចជំរុញការអប់រំ បច្ចេកវិទ្យា និងការអភិវឌ្ឍសេដ្ឋកិច្ចនៅកម្ពុជា ពិសេសជួយលើកកម្ពស់វិទ្យាស្ថានបច្ចេកវិទ្យាកម្ពុជា ឱ្យក្លាយទៅជាវិទ្យាស្ថានឆ្នើមសម្រាប់ការសិក្សាផ្នែកវិស្វកម្មមេកានិកនៅកម្ពុជា និងបណ្តុះបណ្តាលយុវជនកម្ពុជានូវជំនាញចាំបាច់ដើម្បីទទួលបានជោគជ័យក្នុងទីផ្សារការងារពិភពលោក៕